Prishtinë, 29 maj - Sot, në mëngjes rreth orës 08:10, derisa po përgatitej për vizitën rëndomtë mjekësore të mëngjesit,   është sulmuar dhe kërcënuar në vendin e saj të punës Dr. Dafina Mahmutaj dhe stafi i Kirurgjisë Abdominale B.

Sipas deklaratës së deponuar nga Reparti i Kirurgjisë Abdominale,  një palë ka hyrë në dhomën e mjekëve dhe infermiereve duke  kërkuar sqarim për  një rast, duke fyer gjithë stafin shëndetësorë.   Në njoftim bëhet e ditur se stafi mjekësorë ka  ofruar vullnetin për të dhënë sqarimet e nevojshme, mirëpo pala kërkoi të kontaktonte me shefin e repartit.

Palës i është kërkuar  të dalë jashtë dhe të pres derisa të vinte shefi i Repartit, menjëherë pas kësaj,  ai filloj ta sulmonte fizikisht Dr. Mahmutaj,  gjë të cilën e parandaluan kolegët.

Pastaj pala  fillojë kacafytjet me stafin dhe përcjellësit  e pacientëve, po ashtu drejtoi ofendime ndaj saj dhe tërë stafit.  Në njoftim thuhet se  gjatë gjithë kohës pala ekspononte armën që mbante në brez duke kërcënuar  indirekt.

Ndërkohë, është lajmëruar  kompania e sigurimit fizik “ Rojet e Nderit”, të cilët intervenuan menjëherë e më pastaj lajmërohet  edhe Policinë e Kosovës.

Pas ardhjes së Policisë u kuptua se personi në fjalë ishte polic, edhe  pse nuk ishte me uniformë dhe në detyrë zyrtare.

QKUK kërkon nga organet kompetente  të ndërmerren masa adekuate ndaj personit në fjalë dhe të krijohet më shumë siguri në vendin e punës për stafin shëndetësorë.