Prishtinë, 2 tetor - Nga 1 deri me 7 Tetor, Zyra e UNICEF-it në bashkëpunim me Ministrinë e Shëndetësisë do të shënojë Javen për të Ushqyerit me Qumësht të Gjirit në Kosovë me moton “Të ushqyerit me qumësht të gjirit – synimi për jetë më të mirë“.

Këtë vit, Java e të Ushqyerit me Qumësht të Gjirit do të shënohet në Gjakovë, së bashku me Ministrinë e Shëndetësisë dhe Komunën e Gjakovës, të Enjten me 2 Tetor, në Qendrën Kryesore ëe Mjekësisë Familjare, për të biseduar me prindërit për rëndësinë e të ushqyerit me qumësht të gjirit dhe përkrahjen e familjes në mirëqenien e fëmijës dhe fillimin e jetës së shëndoshë.

Kjo ngjarje kontribon poashtu në iniciativën programore të UNICEF-it, “Gjakova për fëmijët” e cila përmban përfshirjen dhe llogaridhënien për realizimin e të drejtave të fëmijëve.

Pas takimit në QKMF në Gjakovë, përfaqësuesit e Ministrisë së Shëndetësisë, zyrës së UNICEF-it, Kryetarja e Komunës së Gjakovës dhe përfaqësuesit e autoriteve lokale shëndetësore do të vizitojnë lindoren në spitalin në Gjakovë, për të përkrahur dhe inkurajuar nënat e reja për të praktikuar të ushqyerit me qumësht të gjirit dhe duke shpërndarë material për rëndësinë e të ushqyerit me qumësht të gjirit.

Për çdo vit, UNICEF-i në bashkëpunim me partner e shënon Javën për të Ushqyerit me Qumësht të Gjirit, e cila ka për qëllim të theksojë rolin e rëndësishëm dhe kritik të ushqyerit me qumësht të gjirit në zhvillimin fizik, emocial dhe psikosocial të fëmijës.

Javë e të ushqyerit me qumësht të gjiriti e thekson rolin e madh të të ushqyerit me qumësht të gjirit në jeten e fëmijëve dhe rëndësin e promovimit të vlerës së të ushqyerit me qumësht të gjirit në nivel global, vendor dhe të komunitetit.

“Fillimi i shëndoshë i jetës për të gjithë fëmijët bëhet përmes të ushqyerit me qumësht të gjirit - një nga mënyrat më të thjeshta, mençura, si dhe më kost efektive që kemi për të përkrahur fëmijët më të shëndoshë, familjet më forta dhe rritjen e qëndrueshme\", thotë Zt. Antony Lake, Drejtori Ekzekutiv i UNICEF-it me rastin e Javës për të Ushqyerit me Qumësht të Gjirit 2014.

Që nga viti 1990, numri i vdekjeve të parandalushme të fëmijëve nën moshën 5 vjeçare ka shënuar rënie për 47%. Megjithatë, në nivelin global për secilin vit afër 7 milion fëmijë vdesin para moshës 5 vjeçare dhe rreth 40% janë të porsalindur.

Fillimi i hershëm i të ushqyerit me qumësht të gjirit brenda orës së parë pas lindjes mund të parandalojë 1 në 5 vdekje dhe parandalojë më shumë se 500,000 vdekje të fëmijëve nën moshën pesë vjeçare.

Znj. Laila Omar Gad, shefe e Zyrës së UNICEF-it në Kosovë thekson se \"evidenca e shkencës dokumenton qartë përpërësitë e të ushqyerit me qumësht të gjirit, lidhur me reduktimin e vdekjeve të fëmijëve, por edhe në promovimin e rritjes dhe zhvillimit kognitiv të fëmijëve, e cila kontribon në përmirësimin edhe të shëndetit në vitet e mëvonshme dhe përmirësimin e arritjeve arsimore\".

Njohja e këtyre përparësive, ka bërë që shumë qeveri janë duke e vendosur të ushqyerit me qumësht të gjirit në qendër të programeve të tyre për të ushqyerit dhe se numri i vendeve me shkallë të rritur të të ushqyerit me qumësht të gjirit vazhdimisht është duke u përmirësuar.

Lidhur me këtë studimet dëshmojnë se përkrahja e vazhdueshme e nënave nga familja dhe nga institucionet shëndetësore kontribon në rritjen e iniciativave për të ushqyerit me qumësht të gjirit dhe inkurajon të ushqyerit ekskluziv me qumësht të gjirit.

Drejtori Ekzekutiv i UNICEF-it, Anthony Lake thekson \"të bashkohemi përsëri në frymën e progresit dhe arrijmë rezultate më të mira për fëmijët duke e prioritizuar të ushqyerit më qumësht të gjirit në nivelin global, për t’i mundësuar secilit fëmijë fillimin sa më të mirë në jetë\".

Përmirësimi i gjendjes shëndetësore të fëmijëve në Kosovë mbetet një nga prioritetet kryesore për UNICEF-in dhe partnerët e saj.

Së bashku me Ministrinë e Shëndetësisë, partnerët dhe institucione të tjera, UNICEF-i është duke përkrahur aktivitetet e rregullta dhe intervenimet që mbështesin të ushqyerit me qumësht të gjirit dhe ushqyerit adekuat të foshnjës dhe fëmijës së vogël.

Zyra e UNICEF-it në Kosovë gjatë kësaj jave do të përkrah emitimin e videoklipit në televizion për sensibilizuar popullsinë për të ushqyerit me qumësht të gjirit, si dhe përkrah shtypjen e materialeve edukative promovuese për institucionet shëndetësore.

Zyra e UNICEF-it në Kosovë do të vazhdojnë të punojnë me të gjithë partnerët për të promovuar dhe mbrojtur të ushqyerit me qumësht të gjirit për t\'i mundësuar fëmijëve fillim të shëndoshë në jetë!