Prishtinë, 26 shtator - Dita Botërore e Kontracepsionit (DBK) shënohet në mbarë botën dhe ka për qëllim ngritjen e vetëdijes së popullatës për kontracepsionin dhe marrëdhëniet e sigurta seksuale, në veçanti fuqizimin e të rinjëve që të bëjnë zgjedhje të informuar për shëndetin e tyre seksual dhe riprodhues. 
 
Me këtë rast, UNFPA në Kosovë nëpërmjet fondeve të Qeverisë së Luksemburgut dhe në bashkëpunim me Ministrinë e Shëndetësisë, organizon tryezën e rrumbubllaktë për shënimin e Ditës Ndërkombëtare të Kontracepcionit 2014 me moton “E ardhmja jote është zgjedhja jote!”, që do të mbahet në “Hotel Sirius”.

Rreth 222 milionë gra në vendet në zhvillim nuk i kanë nevojat e plotësuara për planifkim familjar. Edhe në Kosovë, sipas Anketës Demografike dhe Shëndetësore të vitit 2009, përdorimi i metodave moderne të planifikimit familjar është shumë i ultë, 15 %, gjë që tregon për nevojat e paplotësuara të popullatës së moshës riprodhuese.

Nga hulumtimi “Sjelljet shëndetësore tek fëmijët e moshës shkollore” të vitit 2004, është raportuar se nga 4531 nxënës të intervistuar, 13.3% prej tyre kanë pasur marrëdhënien e parë seksuale nën moshën 15 vjeçe, nga të cilët 26.5 % nuk kanë përdorur asnjë masë mbrojtëse.

Dita Botërore e Kontracepsionit 2014 fokusohet në fuqizimin e të rinjëve që të mendojnë paraprakisht, dhe ta përfshijnë kontracepcionin në planet e tyre të ardhme, në mënyrë që të parandalojnë shtatzënitë e paplanifkuara apo infeksionet seksualisht të transmetueshme (IST).

Gjithashtu, rëndësi e veçantë do t’i kushtohet komunikimit në mes të prindërve dhe fëmijëve të tyre për shëndetin seksual dhe riprodhues, përfshirë kontracepsionin. 

Në Kosovë, DBK do të shënohet me moton “E ardhmja jote është zgjedhja jote!” Për këtë qëllim, UNFPA, nëpërmjet fondeve të Qeverisë së Luksemburgut, në bashkëunim me Ministrinë e Shëndetësisë, Qendrën për Zhvillim të Mjekësisë familjare, OJQ “Health for All” dhe PEN, do të implementojë një seri të aktiviteteve:

·    Tryezë e rrumbullakët me vendimarrësit dhe të rinjët për Ditën Ndërkombëtare të Kontracepsionit (e premte, 26 Shtator, Hotel “Sirius” 8:30-12:00)

·    Shfaqja e një drame e përgatitur nga të rinjtë;

·    Shpërndarja e 22000 broshurave informative lidhur me shëndetin riprodhues të të rinjëve nëpërmes shtypit ditor dhe aktiviteteve të tjera edukative shëndetësore;

·    Një pikë informuese në qendër të Prishtinës, ku edukatorët e rinjë bashkëmoshatar do të shpërndajnë broshura, kondoma falas dhe do të jepen informata nga gjinekologu për sjelljet e shëndetshme seksuale, përfshirë promovimin e kondomit si mbrojtje e dyfishtë (e premte, 26 shtator);

·    Shfaqja e TV spoteve për vetëdijësimin e të rinjëve dhe prindërve të tyre rreth shëndetit seksual dhe riprodhues (25 shtator – 01 tetor).