Prishtinë, 27 korrik - Me moton, “Është më afër se që mendon”, Në Klinikën e Sëmundjeve Ngjitëse të QKUK-së, është shënuar dita botërore e Hepatitit B dhe C, aktivitet ky që shënohet  për herë të parë në Kosovë.
 
Me këtë rast, Ministri i Shëndetësisë i Republikës së Kosovës,  Dr. Ferid Agani, tha se  Hepatiti është sëmundje e cila vazhdon të paraqes  problem për shëndetësinë publike, përkundër përpjekjeve të jashtëzakonshme të ekspertëve shëndetësorë të Klinikës Infektive dhe atyre të spitaleve rajonale.

“Në vitet e fundit po paraqiten edhe lloje të reja të sëmundjeve të hepatitit dhe po e vështirësojnë  edhe më shumë situatën. Më vjen mirë që organizata e infektologëve e ka ngritur këtë çështje për vetëdijesim të qytetarëve. Ministria e Shëndetësisë e mbështetë propozimin e Shoqatës së infektologëve për formimin e një strategjie kombëtare në luftë kundër kësaj sëmundje” tha Ministri Agani.
 
Në  anën tjetër Dr. Skënder Syla, Drejtor i Zyrës së Organizatës Botërore të Shëndetësisë për Kosovë, shpjegoi se nga statistikat e OBSH-së, thuhet se 2 miliardë njerëz në botë janë të infektuar nga hepatiti B dhe rreth 150 milionë me hapatit C.

“Kjo ditë duhet të na ofrojë një mundësi për t’u përqendruar në veprime konkrete si janë  fuqizimi i  parandalimit dhe testimit dhe kontrollimi i hepatitit viral, rritja e mbulueshmërisë së vaksinimit kundër  hepatit B” potencoi dr.Syla.

Sipas tij, OBSH, për këtë vit është përqendruar në parandalimin e  hepatitit C, tek përdoruesit e drogave dhe të infektuarit me virusin  HIV AIDS, pra për vetëdijesim të qytetarëve, ku sipas të dhënave të OBSH –së, rreth 9 milionë njerëz në botë janë të infektuar me hepatit C.

Dr. Shemsedin  Dreshaj, Drejtor i Klinikës Infektive, theksoi se kjo sëmundje në nivelin botëror paraqet nivelin e tretë e cila shkakton vdekjen. “ Kosova sipas analizave nuk ka numër të madh të rasteve, mirëpo janë në rritje e sipër”, përfundoi dr. Dreshaj.
 
Me  këtë rast u bë thirrje që mos të injorohet  hepatiti sepse është sëmundje me forcë vdekjeprurëse që prekë, një në dymbëdhjetë njerëz në të gjithë botën, por shumë rrallë shfaq shenja të dukshme.