Prishtinë, 13 tetor - Ministri i Shëndetësisë Imet Rrahmani priti sot në takim përfaqësuesit e fondacioneve nga Italia “Nikolla Ciardelli” dhe “Cure 2 Children”, të cilët që prej tetë vjetësh bashkëpunojnë  me Repartin e Hemato-onkologjisë të Klinikës së Pediatrisë të QKUK-së, dhe e ndihmojnë atë me sigurimin e terapisë dhe trajtimit të fëmijëve me sëmundje malinje.

Ministri Rrahmani është shprehur falënderues për misionin e këtyre dy fondacioneve në projektet mbështetëse për Kosovën si dhe për vet Qeverinë e Italisë, e cila, gjithashtu, është kontribuese e rëndësishme në zhvillimin e shërbimeve deficitare shëndetësore në Kosovë.

Përfaqësuesit e dy fondacioneve kanë marrë pjesë një ditë më parë zbulimin e pllakës përkujtimore në Repartin e Hemato-onkologjisë të Klinikës Pediatrike me emrin e ish-ushtarit dhe humanistit italian Nikolla Ciardelli, i cili kishte shërbyer në kuadër të forcave paqeruajtëse të KFOR-it në Kosovë, përpara se të ndahej nga jeta, gjatë një misioni tjetër të ngjashëm jashtë Italisë për çka në shenjë respekti për veprat e tij edhe është themeluar Fondacioni me emrin e tij, që po kontribuon në trajtimin e fëmijëve kosovarë më sëmundje malinje.

Ministri Rrahmani e ka vlerësuar gjithashtu bashkëpunimin  e mirë midis ekipeve mjekësore nga Italia dhe stafit të Hemato-onkologjisë në Pediatri, ndërkohë që përfaqësuesit e “Nikolla Ciardelli” dhe “Cure 2 Children”, janë shprehur se do të vazhdojnë kontributin në interes të fuqizimit të shërbimit shëndetësore për fëmijë në Kosovë dhe shpëtimit të jetës së fëmijëve të rrezikuar nga sëmundje të rënda.