Prishtinë, 8 gusht - Qendra Klinike Universitare e Kosovës, ka përfituar  në formë të donacionit 350 proteza të jashtme të gjinjve për pacientet  që kanë hequr gjirin si pasojë e kancerit.

Dr. Genc Demjaha, nga shoqata e menaxherëve shëndetësor e Kosovës- Medigal  tha se nga muaji Mars, në bashkëpunim me Shoqatën Parlan nga Suedia kanë filluar iniciativën  për dhurimin e donacionit  350 proteza të jashtme të gjinjve për pacientet  që kanë hequr gjirin si pasojë e kancerit.

“Donacioni ka ardhur nga gratë suedeze që  kanë pasur probleme të kësaj natyre që janë të grumbulluara në  një shoqatë” shpjegoi Demjaha.

Ai premtoj angazhimin e shoqatës së tij për organizimin edhe të donacioneve të tjera që do të ishin të mirëseardhura për shëndetësinë kosovare.

Në anën tjetër, Dr. Fitim Selimi, Shef i Kirurgjisë Torakale, theksoi se brenda viti në repartin e Kirurgjisë Torkale, trajtohen 100 deri 150 raste të pacienteve që kanë probleme me kancerin e gjirit, por vetëm një pjesë e tyre kanë nevojë për proteza të tilla.

“Ky donacion do të jetë i mirëseardhur për repartin tonë, regjistrimin e tij do të bëhet në Barnatore qendrore, e më pastaj varësisht nga nevojat që kanë pacientet do të përdoren protezat”, tha dr. Selimi

Drejtori ekzekutiv i QKUK-së, ka formuar komisionin për pranimin dhe regjistrimin e donacionit, i cili fillimisht  është vendosur në barnatoren qendrore dhe më pastaj do të bëhet tërheqja nga Reparti i Kirurgjisë Torakale.