Prishtinë, 27 prill - Në Klinikën e Pediatrisë të Qendrës Klinike Universitare të Kosovës është bërë përurimi i rinovimit të dy kateve,  Reparti i Neurologjisë , Reparti i Gjenetikës dhe Reparti i Gastroenterologjisë – rastet kronike dhe rastet akute, investim në vlerë prej 15,477.00 euro.. 

Me këtë rast, drejtori  i Klinikës së Pediatrisë, dr. Muharrem Avdiu, tha se investimet e bëra nga kjo bankë janë të mirëseardhura dhe shumë të domosdoshme për këtë klinikë. “ Përmes këtij investimi është intervenuar në nyje sanitare dhe në infrastrukturën e përgjithshme të dy kateve të Klinikës së Pediatrisë” theksoi dr. Avdiu.

Në anën tjetër, dr. Izet Sadiku, Zv. Ministër i Shëndetësisë së Republikës së Kosovës, tha se përmes këtij investimi do të lehtësohet puna e profesionistëve të klinikës së pediatrisë dhe do të ketë trajtim më të mirë për fëmijët që kërkojnë ndihmë mjekësore në këtë klinikë. Sipas tij,  me ndërtimin e Spitalit Pediatrik- Kirurgjik do të krijohen kushte shumë më të mira për fëmijët e Kosovë. Ai po ashtu, përmendi donacionin e bërë nga Projekt Hope për furnizim me terapi për fibrozë cistike dhe terapi tjetër përcjellëse.

Z. Alber Lumezi, drejtor gjeneral i  NLB Prishtina, tha se misioni i bankës është koroprativ social që nënkupton investimet dhe përkrahjen e popullatës së re, me këtë rast të fëmijëve që përbëjnë një pjesë të madhe të popullatës.   Ai tha se ndjehet i lumtur që kanë pasur mundësi të ndihmojnë fëmijët dhe të lehtësojnë trajtimin e tyre në kuadër të Klinikës së Pediatrisë.