Mitrovicë, 7 dhejtor - Spitali i  Përgjithshëm  i Mitrovicës “Sami Haxhibeqiri”,  deri tani ka përfituar  3.5 milion euro investime dhe renovime  të objekteve ekzistuese  nga Norwegian  Aid  Committee. 

Për tu njohur me investimet e bëra në këtë Spital, gjatë ditës së sotme,  në vizitë kanë qëndruar Ambasadori norvegjez në Kosovë, Jan Braathu dhe drejtori i Përgjithshëm i Shërbimit Spitalor Klinik Universitare të Kosovës, dr. Curr Gjocaj,  me bashkëpunëtorë.

Ambasadori  Brathuu, bashkë me Dr. Gjocaj dhe me përfaqësues të Spitalit të Mitrovicës,  kanë vizituar hapësirat e sapo rinovuara të Repartit të  Fiziatrisë, Neurologjisë, Patologjisë,  hapësira për Telemjekësi dhe disa shërbime tjera.

Investimi i Norwac ishte lejuar dhe nënshkruar nga vetë drejtori Gjocaj, derisa ishte Drejtor i Departamentit për Shërbime Shëndetësore në Ministrinë e Shëndetësisë.

Norwac,  më   2008-2009,  kishte bërë renovimin e bllokut internistik, 2009-2010,  bllokut diagnostik dhe më 2010, hapësirat e  kuzhinës spitalore, përderisa hapësirat e vizituara sot,  pritet të lëshohen shumë shpejtë në punë.

Me rastin e vizitës në hapësirat e sapo rinovuara,  Ambasadori norvegjez,  Jan, Bathuu, tha  se  është i  gëzuar  që sot ka parë hapësirat e  renovuara  dhe se kanë qenë me shumë fat  që kanë arritur të sigurojnë fonde për të realizuar këtë projekt. 

Sipas tij, pas  kërkesave të vazhdueshme është arritur të binden kolegët në Oslo se  duhet ndihmuar dhe përkrahur një projekt i tillë, edhe pse para 2 viteve ishte skeptik se ai mund të realizohej. 

Ai tha se Kosova ka specialistë të mirë dhe staf shëndetësorë të mirë dhe është i kënaqur me atë që ka parë në Mitrovicë. 

Ambasadori  Brathuu,  theksoi se është me shumë rëndësi që është siguruar edhe hapësira e nevojshme  për Telemjekësi dhe beson se kjo do të ndihmojë shumë.

Në anën tjetër, Dr. Curr Gjocaj, Drejtor i Përgjithshëm i SHSKUK, tha se është shumë i nderuar që ka pasur  rastin të nënshkruaj dhe japë vizën për këtë projekt donacion derisa drejtonte  Departamentin për Shërbime Shëndetësore në MSH dhe që ka pasur rastin ta vazhdojë  me projektin  edhe si drejtori  i SHSKUK. 

Ai falënderoj Ambasadorin Norvegjez  dhe gjithë popullin e Norvegjisë që vazhdimisht përmes investimeve kanë përkrahur  Spitalin e Mitrovicës.  Sipas tij, po të mos ishte populli i Norvegjisë  me  ndihmat dhe përkrahjen e vazhdueshme, nuk do të bëheshin investimet e tilla.

Një fjalë rasti mbajt edhe dr. Zaim Musa, drejtor mjekësor i Spitalit të Mitrovicës, i cili tha se investimet e bërë do të lehtësojnë trajtimin e pacientëve dhe do të jetë lehtësim  edhe për stafin që do të punojë.

Një fjalë rasti mbajti edhe  përfaqësuesja e Norwacut,  e cila tha se  përkrahjen e kanë filluar gjatë luftës së Kosovës,   kur  kanë qenë të vendosur në Maqedoni, për të vazhduar tutje  me investime edhe pas lufte.

Repartet dhe shërbimet e rinovuara në kuadër tw Spitalit të  Përgjithshme  në Mitrovicë  pritet që shumë shpejtë të lëshohen në punë.