Prishtinë, 23 shtator - Deputeti republikan nga Lugina e Preshevës, Riza Halimi dhe Kryetari i Këshillit Kombëtar Shqiptar të Luginës, Galip Beqiri, i shprehën Ministrit Ferid Agani falënderimin e strukturave dhe banorëve të Luginës së Preshevës për ndihmën që Ministria e Shëndetësisë u ka dhënë  për shkollim specialistik mjekëve dhe stomatologëve të kësaj ane. 

Ministri i Shëndetësisë i Republikës së Kosovës, Ferid Agani, priti sot në takim Deputetin republikan të Luginës së Preshevës, Riza Halimi dhe Kryetarin e Këshillit Kombëtar Shqiptar të Luginës së Preshevës Galip Beqiri.

Në këtë takim, Halimi dhe Beqiri i shprehën Ministrit Agani falënderimin e strukturave dhe banorëve të Luginës së Preshevës për ndihmën që Ministria e Shëndetësisë e Kosovës u ka dhënë  për shkollim specialistik mjekëve dhe stomatologëve të kësaj ane.

Ministria e Shëndetësisë  ka ndarë mjete në vlerë prej njëqind mijë eurove për shkollimin specialistik të 18 kandidatëve nga Lugina e Preshevës në degën e Mjekësisë dhe të Stomatologjisë.

Delegacioni nga Lugina e njoftoi Ministrin Agani me vështirësitë e banorëve të komunave shqiptare në Luginë, problemet me të cilat ballafaqohen ata dhe vështirësitë me të cilat ballafaqohen kandidatët e këtyre komunave, të cilët duan të ndjekin shkollim specialistik dhe programe të edukimit të vazhduar profesional.

Gjatë bisedës u theksua edhe nevoja e senisibilizmit  edhe më shumë  të çështjes së regjistrimit të studentëve nga Lugina e Preshevës në degë të ndryshme të Fakultetit të Mjekësisë të Universitetit të Prishtinës. 

Ministri Agani shprehu gatishmërinë që MSh të vazhdojë mbështetjen e kandidatëve nga Presheva për specializime, në bazë të kërkesave që do të vinin nga autoritetet përgjegjëse të Luginës së Preshevës.