Gjilan, 19 dhjetor – Organizata Handikos në Gjilan ka prezantuar të enjten raportin vjetor të punës për këtë vit, mbi të arriturat dhe sfidat sa i përket përmbushjes së nevojave për personat me aftësi të kufizuara.

Në këtë ngjarje ka marr pjesë nënkryetari, Arbër Ismajli, përfaqësues nga KFOR’i turk, sikurse edhe nga bizneset e shoqëria civile.

Fatmir Shurdhani, menaxher i kësaj organizate, theksoi se me mbështetjen e Komunës së Gjilanit, ka përmirësime në fushën e arsimit për këtë kategori, duke e falënderuar këtë institucion për mbështetjen me të gjitha kapacitetet e tyre.

Por, ai kërkoi që në vitin e ardhshëm të bëhet më shumë për t’iu mundësuar qasje më të lehtë personave me aftësi të kufizuara në rrugët e qytetit, sikurse edhe në institucione.

Nënkryetari i Komunës, Arbër Ismajli, tha se mbështetja ndaj personave me aftësi të kufizuara, është mision i madh.

“Ta ndihmosh një person me aftësi të kufizuara, është një mision i madh që vlerësohet edhe te Zoti. Si Komunë e Gjilanit e kemi mbështetur Handikos’in me mundësitë tona. Por, jemi të vetëdijshëm që nuk është e mjaftueshme karshi nevojave të kësaj organizate. Me aq sa kemi mundësi, nuk do të lëmë guri pa lëvizë për t’i jetësuar kërkesat e Handikos”, tha Ismajli.

Njeriu numër dy i Gjilanit tha se është i lumtur me finksionalizimin e Komitetit të personave me aftësi të kufizuara.

“Një hap i madh për adresimin e nevojave për këtë kategori e kemi bërë si komunë me themelimin e Komitetit të personave me aftësi të kufizuara. Jemi zotuar publikisht dhe po e ritheksoj edhe këtu, në prezenzën tuaj, se të gjitha rekomandimet që dalin nga ky Komitet, do t’i zbatojmë”, tha ai.