Prishtinë, 30 mars - Shërbimi Spitalor Klinik dhe Universitar i Kosovës (SHSKUK) më datën 28 dhjetor 2020 kishte nënshkruar kontratë emergjente një burimore për furnizim me Heparin Natrium 20000 IU/mL, në ampula 1 m/L me kompaninë “Liri Med”. Vlera e kësaj kontrate ishte 119,000.00 euro me kohëzgjatje prej 3 muajsh.

KDI ka gjetur se SHSKUK kishte shkelur kontratën në fjalë duke pranuar një produkt ndryshe nga ai që kishte kontraktuar, respektivisht Heparin Natrium amp. 25000 IU-5ml.   

Po i njëjti institucion, më datën 24 nëntor 2020 sipas KDI-se kishte shpallur tenderin me procedurë të hapur për furnizim me barna nga Lista Esenciale, ku në Lot-in 29 kërkohej Heparin Natrium 20000 IU/mL, në ampula 1 m/L. Vlera e parashikuar për këtë lot ishte 42,800.00 euro.
 
Lidhur me Lot-in 29, SHSKUK kishte pranuar vetëm një ofertë dhe atë nga “Liri Med”, i cili ofertoi me produkt ndryshe nga ai që ishte kërkuar, pra me Heparin Natrium amp. 25000 IU-5ml.

Duke u nisur nga ky fakt, SHSKUK shpalli këtë ofertë si të papërgjegjshme me aryetimin se operatori ka ndryshuar specifikat e produktit dhe mori vendim për t’a anuluar Lot-in 29.
 
Një arsye tjetër e anulimit sipas KDI-se ishte edhe fakti se oferta e operatorit kishte tejkaluar vlerën e parashikuar për këtë furnizim, e cila ishte 4.28 EURO për njësi.

''Përkundër këtyre veprimeve që SHSKUK i kishte bërë vetëm një muaj më parë, i njejti institucion përmes kontratës emergjente të lartëcekur, pranon furnizime jashtë specifikave të kontratës dhe atë me çmim dyfish më të lartë për njësi, 8.50 EURO'', thekson KDI.

Humbjet e parasë publike sipas KDI vlerësohen të jenë  59,920.00 EURO.
 
Me datën 13 janar 2021, KDI ka pranuar konfirmimin nga Agjencia e Kosovës për Produkte dhe Pajisje Medicinale (AKPPM), se Heparin Natrium 20000 IU/mL, në ampula 1 m/L, nuk është i regjistruar dhe as i importuar zyrtarisht në Kosovë.