Prishtinë, 2 dhjetor - Qendra Kombëtare e Mjekësisë së Punës në Gjakovë si njësi organizative e Shërbimit Spitalor Klinik Universitar të Kosovës (SHSKUK) në të cilin ofrohet dhe zbatohet kujdesi shëndetësor tretësor, me qëllim të vazhdimit të ofrimit të shërbimeve shëndetësore me cilësi të lartë si dhe zgjerimit të fushëveprimtarisë  për ofrimin e shërbimeve të reja shëndetësore, është pajisur me aparatura të reja në disa kabinete.
 
Kabineti i Otorinolaringologjisë në QKMP-Gjakove  është pajisur me njësinë e specializuar për ORL -“ENT UNITE” me modulim fleksibil dhe precizitet të lartë profesional gjatë  diagnostifikimit dhe trajtimit të pacientit, si dhe me njësinë suplementare Mikroskopin Otologjik “Carl Zeiss” me optikë tredimenzionale për trajtim  dhe  diagnostifikim profesional në patologjitë otogjene.
 
VIDEONYSTAGMOGRAF- Otometic- Aparaturë diagnostike e cila ekzaminon sistemin  periferik  vestibular  si dhe rrugët centrale vestibulare. Patologjia detektohet në secilin nivel të sistemit  vestibular me ndihmën e : GAZE,TRACKING SACCADE, OPTOKINETIC, STATIC dhe CALORIC test. Aparatura ka sistem kompjuterik i cili kryen analizën e të dhënave në kohë reale me saktësi  maksimale
 
Në Kabinetin e Radiologjisë është funksionalizuar Mamografi klasik “MAT” nëpërmjet të cilit mund të  bëhet diagnostifikimi  i sëmundeve malinje të gjirit.

 Andaj, i inkurajojmë të gjitha gratë të i nënshtrohen kontrollit të diagnostifikimit të   gjirit, në kuadër të parandalimit dhe të trajtimit sa më të hershëm të kësaj sëmundje.
 
Gjithashtu, QKMP- Gjakovë që nga data 17.11.2014 nga një donacion  i Ambasadës Japoneze në Austri, është pajisur me aparatura të reja për Kabinetin Oftalmologjik, përkatësisht me ;

1.         Argon Laser Photocoalogulation - aparat oftalmologjik që  përdoret  tek  retinopatia diabetike proliferative, sëmundjet vaskulare dhe retinale.

2.      YAG –Laser - aparat oftalmologjik  që  përdoret  për:

                         Capsulotomy -  te kataraktat sekondare.

                         Iridotomy -   te Glaukoma.

Aparaturat e lartpërmendura të  Kabinetit Oftalmologjik  të QKMP-së pas trajnimit të stafit do të fillojnë  me trajtimin e pacientëve me patologjitë e lartpërmendura. Nëpërmjet këtyre aparaturave  ofrohen shërbime shëndetësore të cilat mungojnë në Institucionet Shëndetësore të Rrafshit të Dukagjinit dhe të cilat tashmë janë  në funksion të qytetarëve.

Qendra Kombëtare e Mjekësisë së Punës - Gjakovë mbetet e përkushtuar në zgjerimin e kapaciteteve  ekzistuese profesionale për ofrimin  shërbimeve sa më cilësore  për të gjithë banorët e Republikës së Kosovës.