Prishtinë, 21 shkurt - Ministri i Shëndetësisë së Republikës së Kosovës Ferid Agani me bashkëpuntorë, priti sot përfaqësuesin e Khalifa Foundation nga Emiratet e Bashkuara Arabe, Youssif Ibrahim AlHosany.

Në takim u bisedua për mundësinë e mbështetjes nga ana e EBA-së të projekteve në sektorin e shëndetësisë në Kosovë.

Ministri Agani, pasi informoi mysafirin për punën që është bërë në shëndetësi, që nga pas lufta e deri në pavarësinë e vendit, e në veçanti prej pavarësisë e këtej, theksoi se  Kosova ka nevojë për ndihmën e miqve të saj në mbështetje në fushën e shëndetësisë.

Ndihmat do të ishin të mirëseardhura, potencoi Ministri, duke përmendur fushat ku mund të intervenohet me investime nga kjo organizatë arabe siç janë kirurgjia e fëmijëve, ortopedia dhe endoskopia,  e gjithashtu edhe në Spitalin e Vushtrrisë që mban emrin e princit të EBA-së, “Sheik Al Zayed”.

Z. Youssif Ibrahim AlHosany, falënderoi për pritjen dhe shprehu gatishmërinë për të ndihmuar Kosovën. Ai theksoi se ka ardhur të shohë  projektet dhe mundësitë e realizimit të tyre në sektorin shëndetësor.