SHBA, 29 shtator - Që kur bëri të njohur publikisht se kishte kancer në grykë, aktorin Majkëll Daglas e lidhin në mbarë botën me këtë sëmundje.  Aktori thotë se mjekët i japin atij 80 për qind shans se do të shërohet.

Majkëll Daglas nuk bëri komente për gazetarët kur u dha premiera e filmit të tij të ri.

Aktori nuk bëri asnjë koment kur u shfaq para spektatorëve me ekipin realizues të filmit të tij. Aktori, fitues i Çmimit Oskar, po trajtohet për kancer në grykë.

Çdo vit, në të gjithë botën, diagnostikohen më tepër se gjysëm milionë njerëz me kancer në kokë dhe në grykë. Shumica e tyre janë në vendet në zhvillim. Mes këtyre kancereve janë ai në hundë, në gojë, grykë dhe laring.

Dr. Majkëll Beninger në klinikën e Clevelandit përshkruan shenjat paralajmëruese të kancerit.

Një shenjë është një ashpërsim i pakuptuar i zërit, veçanërisht tek një person që pin duhan, kur kjo simptomë zgjat më tepër se 2-4 javë. Në këtë rast është mirë të shkosh tek mjeku. Një tjetër shenjë është dhimbja gjatë gëlltitjes.

Një studim i ri i Insitutit Kombëtar të Kancerit arrin në përfundimin se një numër i madh rastesh të kancerit në qafë dhe në kokë lidhen drejtpërdrejt me pirjen e duhanit. Në studimin që zgjati për 5 vjet, u përfshinë rreth gjysëm milionë njerëz. U zbulua se burrat preken më tepër nga kanceri i grykës, apo i kokës, se sa gratë. Faktorët kryesorë janë duhani dhe alkoholi.

Dr. Sat Parmar në spitalin e Univerisitetit të Birmingamit në Britani, thotë se konsumimi i sasive të mëdha për pije alkoolike dhe i duhanit rrit së tepërmi rrezikun e prekjes nga këto lloj kanceresh.

Në se pi duhan dhe alkohol me shumicë, rreziku për të patur kancer është 26 herë më i madh se një person që nuk pi duhan, apo alkohol.

Majkëll Daglas po kurohet me kimioterapi të kombinuar me rreze, por trajtim mund të jetë edhe ndërhyrja kirurgjikale.

Teknika më e fundit është kirurgjia robotike. Dr. Tod Huntley e preferon këtë mënyrë, sepse ndërhyrja kirurgjikale kryhet në grykë pa çarje nga jashtë.

Kjo metodë nuk shoqërohet me trauma në lëkurën përreth dhe shumë lloje tumoresh të kësaj pjese të trupit, mund të hiqen plotësisht…, shpesh pa trakeotomi, çarje në trake dhe zakonisht pa nevojën e përdorimit të tubit ushqyes për pacientin.

Me kirurgjinë robotike, pacientët kalojnë më pak kohë në spital, rikuperohen më shpejt dhe shmangin çarjet, apo deformimet në fytyrë. Për pakësimin e rrezikut të kancerit në kokë, apo në qafë, mjekët në mbarë botën i këshillojnë pacientët të mos pijnë duhan dhe të mos konsumojnë shumë pije alkoholike.