Prishtinë, 4 dhjetor - Në Klinikën e Pediatrisë të Qendrës Klinike Universitare të Kosovës,  sot ka qëndruar Ambasadori  amerikan, Greig Delawie, i cili fillimisht ka vizituar emergjencën pediatrike për t’u njohur me investimet e bëra nga shteti amerikanë, e më pastaj ka vizituar disa nga fëmijët e operuar nga ekipi  i mjekëve nga Amerika.

Dr. Ramush Bejiqi,  pediatër – kardiolog,  njoftoi se nga  projekti  i fundit i  Organizatës "For Heart And Soul",  kanë përfituar 6 fëmijë, përderisa në 18 misionet e dertanishme,  168 fëmijë të trajtuar  dhe mbi 1860 fëmijë të kontrolluar.

Ambsadori Delawie,  me këtë rast tha se ndihma e dhënë nga mjekët amerikanë tregon  për  vullnetin që kanë qytetarët amerikanë për të ndihmuar Kosovën.

Ai theksoi se bashkëpunimi ndërmjet  Kosovës dhe  SHBA-së është  i vazhdueshëm. 

Sipas tij,  rasti i organizatës që ndihmoi fëmijët, por edhe ndihmat e tjera nga qytetarët e Amerikës tregojnë dëshirën e qytetarëve nga Amerika për ta ndihmuar Kosovën.

Ai premtoi mbështetje të mëtejmë të SHBA-së për Kosovën dhe shëndetësinë kosovare.

Dr. Curr Gjocaj, Drejtor i Përgjithshëm i Shërbimit Spitalor Klinik Universitar të Kosovës (SHSKUK) falënderoj Ambasadorin Delawie që ka nderuar SHSKUK-në me vizitën e tij, e poashtu mjekët nga Amerika që vazhdimisht po përkrahin dhe ndihmojnë fëmijët me probleme në zemër. 

Ai rikujtoi disa nga ndihmesat e deritanishme nga Shtetet  e Bashkuara të Amerikës, mes tjerash misionin e fundit nga mjekët amerikanë, investimet e US ARMY në renovime të klinikave QKUK, e poashtu,  ndihmesat nga Project Hope dhe të tjerat.

Doktoresha Mary Porish nga “For heart and Soul”,  mes tjerash  sqaroi se  gjithsej 38 fëmijë kanë pasur nevojë për intervenime, por është intervenuar vetëm tek 5 prej tyre, përderisa 1 intervenim tjetër do të kryhet sot.

Dr. Imet Rrahmani, Ministër  i Shëndetësisë i Republikës së Kosovës,  theksoi se MSH ka prioritet shërbimet  pediatrike dhe kjo dëshmohet edhe për përmes ndërtimit të spitalit të ri për shërbimet pediatrike që pritet të ndodhë së shpejti.