Prishtinë, 7 dhjetor - Ministri i Shëndetësisë Ferid Agani, morri pjesë sot në hapjen e Simpoziumit Ndërkombëtar të organizuar nga Shoqata e Farmacistëve të Kosovës (ShFK), që po mbahet në Prishtinë me temën “Përgjegjësitë e reja të farmacistëve dhe kujdesi farmaceutik”.

Ministri Agani tha se këto simpoziume janë të mirëpritura dhe sigurisht dobiprurëse për farmacinë kosovare duke e ditur se farmacia është boshti kryesor i shëndetësisë. 

Ai tha se para dy vite e gjysmë, ky sektor, ka qenë me shumë probleme, por me punën e vazhdueshme të Ministrisë së Shëndetësisë, tani situiata qëndron shumë më mirë.

“Natyrisht se ne si Ministri dhe ju Shoqata e Farmacistëve të Kosovës duhet ta rrisim nivelin e besimit dhe mirëbesimit që  dukuritë negative në sektorin farmaceutik t’i a luftojmë”, tha Ministri.

Ai tha se potenciali kadrovik profesional i ri, jep shpresë që reformat që kanë nisur do të  realizohen.  Në këtë aspekt, shtoi më tej Ministri Agani, themelimi i Odës së Farmacistëve, do të jetë pjesë e këtij procesi reformues, dhe në këtë aspekt ShFK duhet ta jap kontributin e saj, që Oda që do të themelohet ta marrë udhëheqjen e këtij sektori të rëndësishëm kosovar duke mos harruar  se me aprovimin e Ligjit të Sigurimeve Shëndetësore, ndryshimet do të jenë më të lehta.

Kryetari i Shoqatës së Farmacistëve të Kosovës, Besim Muzaqi, theksoi se qëllimi i këtij Simpoziumi është ngritja dhe zhvillimi i farmacistëve në nivelin më të lartë, në frymën e përgjegjësive të reja që sot parashtrohen para profesionistëve të fushës së farmacisë.

Në këtë simpozium, ekspertë ndërkombëtar të farmacisë dhe ata vendorë do të këmbejnë eksperienacat e reja në fushën e farmacisë përmes prezantimeve të ndryshme dhe diskutimeve të temave profesionale.