22 Mars 2023

Nënshkruhet një Memorandum për menaxhimin e mbeturinave në rajonin e Prishtinës

Prishtinë, 12 dhjetor - Nën ombrellën e projektit të financuar nga BE-ja dhe Gjermania, i cili punon drejt zhvillimit të një sistemi të përbashkët të menaxhimit të mbeturinave për rajonin e Prishtinës, kryetarët e komunave të Fushë Kosovës, Gllogocit, Graçanicës, Obiliqit, Podujevës, dhe Prishtinës, nënshkruan sot Memorandumin e Mirëkuptimit (MM) përmes së cilit do të fillojë bashkëpunimi i tyre në këtë drejtim.

Në harmoni me direktivat përkatëse të BE-së dhe ligjet e Kosovës, komunat do të punojnë më tutje për të zhvilluar një Plan Ndërkomunal të Menaxhimi të Integruar të Mbeturinave (PNKMIM) dhe një Marrëveshje për Bashkëpunim Ndërkomunal (MBNK) për punë të përbashkët në sektorin e menaxhimit të mbeturinave.

Zbatimi i planit ndërkomunal të menaxhimit të integruar të mbeturinave do të jetë hapi i radhës drejt krijimit të sistemit të menaxhimit të integruar të mbeturinave, i cili filloi me projektin aktual nga BE-ja dhe Gjermania për ndërtimin, zgjerimin dhe rehabilitimin e deponive dhe stacioneve të transferimit të mbeturinave të ngurta në rajon, me vlerë 35 milionë euro.

“Zbatimi i Strategjisë për Menaxhimin e Integruar të Mbeturinave në Kosovë për periudhën 2021-2030 është prioritet për Ministrinë, dhe komunat janë partnerët tanë lokalë në këtë përpjekje”, tha Linda Çavdarbasha, zëvendësministre e Ministrisë së Mjedisit, Planifikimit Hapësinor dhe Infrastrukturës.

“Përmes një qasjeje ndërkomunale, ne synojmë t'i adresojmë nevojat e komunave për mbështetje në krijimin e një sistemi të menaxhimit të integruar të mbeturinave në përputhje me objektivat tona, legjislacionin kombëtar dhe standardet evropiane.”

Sistemi modern i menaxhimit të integruar të mbeturinave duhet të fokusohet në reduktimin, riciklimin dhe rishfrytëzimin e mbeturinave.

“BE-ja në Kosovë do të vazhdojë të mbështesë zhvillimin e sistemit të menaxhimit të integruar të mbeturinave, i cili do të ndihmojë në mbrojtjen e mjedisit, dhe do ta bëjë ekonominë qarkore realitet në Kosovë. Zhvillimi i këtij sistemi do të kontribuojë gjithashtu në zbatimin e Agjendës së Gjelbër për Ballkanin Perëndimor në Kosovë”, tha Alessandro Bianciardi, Zëvendës Shef i Bashkëpunimit i BE-së në Kosovë.

Për t'i mbështetur reformat e ndërlidhura në sektorin e menaxhimit të mbeturinave, BE-ja së bashku me Qeverinë Gjermane financojnë me 19 milion euro projektet e zbatuara nga GIZ-i, për zhvillimin e politikave dhe legjislacionit të duhur për menaxhimin e mbeturinave, marrëveshjeve të planifikimit dhe bashkëpunimit për menaxhimin ndërkomunal të integruar të mbeturinave, ngritjen e kapaciteteve në nivel qendror dhe lokal, futjen e ekonomisë qarkore dhe zbatimin e projekteve prioritare investuese.  

“Ky Memorandum i Mirëkuptimit do të vendosë themelin për zhvillimin e ekonomisë qarkore si model i prodhimit dhe konsumit,” tha Stefan Mager, Menaxher i Projektit nga GIZ.

“Ne dhe partnerët tanë jemi të përkushtuar për të arritur sukses të qëndrueshëm në aspektin e politikës, sistemeve, shërbimeve dhe teknologjisë së menaxhimit të mbeturinave.”

Që nga viti 2015, BE-ja ka investuar mbi 16 milionë euro në sektorin e menaxhimit të mbeturinave dhe ka ndarë 35 milionë euro të tjera për përmirësimin e menaxhimit të mbeturinave dhe ekonomisë qarkore në Kosovë.

Kalendari

Ngjarjet e datës 22 mars 2023

- Asociacioni i Qendrave për Punë Sociale dhe Departamenti Punë Sociale, Universiteti i Prishtinës “Hasan Prishtina” organizon ditën e dytë të konferencës se dytë Nacionale për shënimin e Ditës Botërore të Punës Sociale. (Fakulteti Filozofik i Universitetit të Prishtinës, ora 9:30)

- Administrata Tatimore e Kosovës në bashkëpunim me Iniciativën Kosovare për Stabilitet organizojnë panel diskutimi me temë “Formalizimi i punësimit”. (Biblioteka Kombëtare, ora 10:00)

- Ministria e Mjedisit, Planifikimit Hapësinor dhe Infrastrukturës organizon takim publik për hartimin e Koncept Dokumentit të Fushës së Ujërave. (Hotel Garden, ora 10:00)

- Ideatorët e platformës "Liria ka emër", Eliza Hoxha dhe Ismail Tasholli, do të vizitojnë Organizatat e dala nga lufta të UÇK-së. (Zyrat e Organizatave të dala nga lufta të UÇK-së, ora 11:00)

- Presidentja e Kosovës, Vjosa Osmani, dhe ministri i Shëndetësisë, Arben Vitia, vizitojnë Klinikën e Gjinekologjisë në QKUK, ku planifikohet të fillojnë shërbimet për Fertilizim të Asistuar Mjekësor (FAM) në shërbimin publik. (Klinika Gjinekologjike në QKUK, ora 11:00)

- Myftiu i Kosovës, Naim Tërnava, jep mesazhin me rastin e fillimit të muajit të Ramazanit. (Selia e BIK-ut, ora 11:00)

 - Kuvendi i Republikës së Kosovës vazhdon seancën plenare. (Kuvendi i Kosovës, ora 12:00)

- Në shënimin e Javës Ndërkombëtare e Parasë, Shoqata e Bankave të Kosovës zhvillon një vizitë në shkollën "Thimi Mitko" në Gjilan. (Gjilan, ora 13:30)

- Instituti Demokratik i Kosovës në bashkëpunim me Transparency International organizon tryezën e diskutimit “Buxhetimi gjinor në kuadër të partive politike në Kosovë”, një diskutim i përbashkët mes kryetareve të forumeve të grave të partive kryesore në vend, trupave menaxhuese zgjedhore, shoqërisë civile dhe korit diplomatik në vend. (Hotel Sirius, ora 14:00)