Prishtinë, 11 janar - Universiteti i Prishtinës (UP) “Hasan Prishtina”, ka shpallur konkursin për ndarjen e bursave universitare për vitin akademik 2015/16.

Konkursi do të jetë i hapur nga data 11 janar deri më 25 janar në orën 15:00. Këtë vendim e ka marrë Këshilli Drejtues i Universiteti të Prishtinës.

Bursa universitare do të ndahen për studentët e nivelit të studimeve themelore (bachelor). Të drejtë aplikimi për bursa universitare kanë studentët, të cilët i plotësojnë këto kushte: Të jenë studentë të rregullt të fakulteteve të UP-së; të jenë studentë të vitit të dytë e më lartë; të mos kenë vit të përsëritur të studimeve, t’i kenë të dhëna të gjitha provimet e vitit paraprak të vitit përkatës në afatin e shtatorit, ta kenë notë mesatare më së paku nëntë , të mos kenë përfituar bursë nga ndonjë institucione tjetër i Republikës së Kosovës për vitin akademik 2015/16.

Ndërkaq me notë mesatare tetë mund të aplikojnë studentët e Fakultetit të Ndërtimtarisë dhe Arkitekturës, Fakultetit të Inxhinierisë Mekanike, të Fakultetit të Inxhinierisë Elektrike dhe Kompjuterike, të Fakultetit të Shkencave të Aplikuara Ferizaj, si dhe studentët e Fakultetit të Shkencave Matematiko Natyrore, përkatësisht Departamentit të Matematikës dhe Fizikës.