Toronto, 14 shtator - Presidenti i Kosovës, Hashim Thaçi, gjatë qëndrimit në Kanada ka marrë pjesë pritjen e organizuar nga shoqatat e komunitetit shqiptar nga rajoni i Torontos, të cilave u ka premtuar se do ta kenë vëmendjen e plotë të institucioneve të Republikës së Kosovës.

Ai në “Facebook”, ka shkruar se gjatë kësaj pritje nxënëseve shqiptarë ua ka shpërndarë edhe abetaren në gjuhën shqipe.

\"Mbrëmë pata nderin të marrë pjesë në pritjen e organizuar nga shoqatat e komunitetit shqiptar nga rajoni i Torontos në Kanada. I falënderova nga afër bashkatdhetarët tanë për kontributin e tyre të jashtëzakonshëm ndër vite dhe i përgëzova për integrimin e tyre në jetën sociale, ekonomike e politike të Kanadasë.
U ndjeva krenar për të arriturat e tyre të cilat u konfirmuan edhe nga Ministrja e Ontarios për Shtetësi dhe Imigrim, znj. Laura Albanese, nga Kryetarja e Bashkisë së Mississaugas, znj. Bonnie Crombie, si dhe nga deputetë të Parlamentit të Ontarios\", ka theksaur ai.

Sipas tij komunitetin tonë e garantova se do të kenë vëmendjen e plotë të institucioneve të Republikës së Kosovës dhe se ata do të jenë ura jonë lidhëse me Kanadanë. Gjithashtu, falënderova edhe qeverinë dhe popullin kanadez për mbështetjen e madhe gjatë periudhës së luftës më ‎1998 - 1999, për kontributin në kuadër të KFOR-it dhe për përkrahjen për pranimin e Kosovës në organizata ndërkombëtare.

\"Me rastin e fillimit të vitit të ri shkollor, për brezat e rinj shpërndamë edhe Abetaren tonë shqipe. Me pjesëmarrësit e pritjes kalova çaste të këndshme\", ka theksuar ai.