Prishtinë, 15 shkurt -  Zëvendëskryeministri Hashim Thaçi, thotë se është i sigurt se Universiteti i Prishtinës “Hasan Prishtina”, do ta rrisë cilësinë në të gjitha segmentet, duke mëtuar të luajë rol edhe në zhvillimin ekonomik të vendit.

Këto komente Thaçi i ka thënë me rastin e 45-vjetorit të themelimit të UP-së.

“Universiteti i Prishtinës ‘Hasan Prishtina’ i bëri 45 vjet! Uroj të gjithë mësimdhënësit, studentët dhe të gjithë ata që dhanë gjithçka për themelimin dhe avancimin e kësaj vatre të dijes dhe rezistencës së qytetarëve tanë.

Sipas tij Universiteti i Prishtinës ‘Hasan Prishtina’ më zgjon nostalgji, marrë parasysh angazhimin tim aktiv si lider i lëvizjes studentore për tri vite, kur me shumë kolegë u organizuam për ta shprehur pakënaqësinë ndaj shtypjes së popullit të Kosovës.

\"Duke qenë i vetëdijshëm për të gjitha sfidat jo të lehta me të cilat përballet sot në kohë tranzicioni, jam i sigurt se Universiteti i Prishtinës ‘Hasan Prishtina’ do ta rrisë cilësinë në të gjitha segmentet duke mëtuar të luajë rol edhe në zhvillimin ekonomik të vendit”, ka shkruar Thaçi në profilin e tij në “Facebook”.