Prishtinë, 12 tetor - Zyra Erasmus+ në Kosovë organizon sot Ditën Informuese të programit Erasmus+ për Institucionet e Arsimit të Lartë si dhe sesioni për studentët.

Kjo ditë informuese do të mbahet në Bibliotekën Kombëtare “Pjeter Bogdani”, amfiteatri i madh.

Në këtë Ditë Informuese Zyra Erasmus+ në Kosovë në bashkëpunim me zyrtarë nga Brukseli do të prezantojnë thirrjen e re për aplikime në kuadër të programit Erasmus+.

Erasmus+ është programi më i ri arsimor i Bashkimit Evropian që synon modernizimin e sistemeve arsimore dhe përshtatjen e tyre me nevojat e tregut të punës dhe të  një bote në ndryshim të vazhdueshëm.

Erasmus+ bashkon në një ombrellë të vetme shtatë programet e mëparshme arsimore të BE-së duke lehtësuar orientimin e përfituesve dhe rregullat e pjesëmarrjes.

Pjesëmarrja në këto programe do të hapë mundësi të reja për Institucionet e Arsimit të Lartë në Kosovë.