Prishtinë, 27 mars - Sindikata e Bashkuar e Arsimit, Shkencës dhe Kulturës e Kosovës (SBASHK) përmes një komunikata për media ju ka bërë thirrje deputetëve te Kuvendit të Kosovës që të mbrojnë ligjet, që ky Parlament i ka votuar  dhe të mos cenojnë pavarësinë e institucioneve të drejtësisë.

"Të nderuar deputetë të Kuvendit të Kosovës, ju përfaqësues të popullit, duke parë se janë mbledhur nënshkrime dhe do të ketë seancë të jashtëzakonshme të Kuvendit për të diskutuar për gjendjen në arsim,  madje thuhet edhe për orët e humbura gjatë grevës  ju  drejtohemi me apelin që të mbroni ligjet, që ky Parlament i ka votuar  dhe mos cenoni pavarësinë e institucioneve të drejtësisë."

"Të nderuar deputetë Ligji për grevat  i Republikës së Kosovës  e njeh  grevën si veprim demokratik dhe nuk obligon grevistët që orët a ditë  e humbura në grevë të kompensohen", thuhet në thirrjen e SBASHK drejtuar deputetëve.

 Ministri Bytyqi sipas SBASHK-ut nxori një vendim  të pabazuar në ligj dhe bashkë me një pjesë të Drejtorëve të Drejtorive Arsimore e të disa shkollave filluan një presion të paparë ndaj mësimdhënësve për  kompensim të orëve të humbura në grevë. 

SBASHK  duke e konsideruar me të drejtë këtë vendim jo ligjor ngriti padi në Gjykatën Themelore në Prishtinë  duke kërkuar që institucioni i drejtësisë të vlerësojë ligjshmërinë e këtij vendimi  dhe SBASHK-u publikisht është deklaruar se do ta respektojë verdiktin e gjykatës.  Mendojmë se çdo diskutim më parlament  në dobi të  vendimit joligjor të Ministrit Bytyqi do të ishte  ndërhyrje dhe presion në institucionin e drejtësisë.

"Deputetë të nderuar ju sot është më mirë të diskutoni  për mungesën e kabineteve të informatikës, kimisë, fizikës e lendeve të tjera, për mungesën e sallave të edukatës fizike,  për gjendjen  e mjerë të nyjave sanitare , pra për mungesën e kushteve elementare të punës në shumicën e shkollave të Kosovës , mungesa këto që ndikojnë shumë në procesin mësimor e edukativ se sa të merreni me një vendim jo ligjor  të Ministrit Bytyqi."

"Sot duhet t’i qortoni Ministrin dhe një pjesë të drejtorëve , të cilët duke bërë presione për zëvendësimin e orëve të humbura në grevë, por pengojnë procesin mësimor. Duhet t’i qortoni e të merrini masa ndaj drejtorëve, si rasti  në Mitrovicë, kur drejtori   jep urdhër me shkrim , që duhet zëvendësuar orët edhe për ditët që mësimdhënësi ka qenë i sëmurë dhe në pushim mjekësor. A ndodh kund në botë kjo?"
 
"Të nderuar deputetë ju informojmë publikisht se nëse vazhdohet me presione ndaj mësimdhënësve për të zëvendësuar orët e humbura gjatë grevës , SBASHK-u duke dëgjuar zërin dhe kërkesën e punëtorëve të arsimit të Kosovës do të shpall grevë  si reagim ndaj këtyre presioneve."

"Ju kujtojmë se mësimdhënësit e Kosovës janë unik në respektimin e vendimit të Këshillit  Drejtues të SBASHK-ut që  mos të kompensohen orët e humbura gjëtë grevës as të shtunave, as në pushimin pranveror  e as ndonjë herë tjetër. Ju kujtojmë po ashtu se edhe pa këto kompensime plani e programi mësimor do të realizohet së paku 90 %", thuhet në fund të komunikatës së SBASHK.