Prishtinë, 6 prill - Ministri i Arsimit, Shkencës dhe Teknologjisë, Arsim Bajrami, ministri i Punës dhe Mirëqenies  Sociale Arban Abrashi dhe kryetari i SBAShK-utj z. Rrahman Jasharaj promovuan Vërtetimin për njohjen e përvojës  së punës  së arsimtarëve gjatë periudhës 1990-1999.

Ministri Bajrami me këtë rast theksoi se, ky vërtetim shënon implementimin e vendimit për njohjen e përvojës së punës së mësimdhënësve të viteve të 90-ta për skemën pensionale.

Ministri Bajrami tha se ky është një hap i domosdoshëm dhe i shumëpritur që mësimdhënësve, të cilët kanë punuar në kohën e mbijetesës së sistemit arsimor t’u njihet përvoja e punës dhe ata të marrin pension të dinjitetshëm.

“Ne kemi bërë hapa të rëndësishëm në këtë mandat qeveritar, sepse tani ka filluar pagesa e përvojës së punës për të gjithë punëtorët e arsimit. Por, në mënyrë të veçantë përmes kësaj skeme, e cila po fillon të implementohet që nga sot, ne po fillojmë që mësimdhënësve t’u japim pensione të merituara për punën e tyre në momentet më të vështira të mbijetesës së arsimit”, u shpreh ministri Bajrami.

Ministri Bajrami foli edhe për Ligjin për mësimdhënësit e viteve 90-ta, për të cilin tha se është fazën e gjetjes së mbulesës financiare për implementimin e tij.

Ministri i Punës dhe Mirëqenies Sociale, z. Arban Abrashi tha se ky vendim është në vazhdimësinë e reformave të cilat i kemi ndërmarrë, në përmirësimin e mirëqenies së të gjithë punëtorëve dhe pensionistëve në këtë rast, të cilët kanë kontribuar në shtetndërtimin e Kosovës.

\"Ky është një hap i madh sa i përket përmirësimit të mirëqenies së punëtorëve të arsimit. Kontributi i tyre është shumë më i madh se sa kjo që po bëjmë sot”, tha ministri Abrashi.

Ndërsa, kryetari i SBAShK-ut z. Rrahman Jasharaj, tha se nga sot të gjithë mësimdhënësit do ta gëzojnë pensionin e plotë të punës dhe do të kenë mundësi të aplikojnë edhe për përshkallëzimin e pensioneve.