Prishtinë, 11 shkurt - Ministri i Arsimit, Shkencës dhe Teknologjisë, Ramë Buja, po qëndron për një vizitë zyrtare në Hamburg të Gjermanisë, ku gjatë ditës së sotme ai ka vizituar  Institutin për Arsim Profesional në Hamburg.

Në fjalimin e tij para drejtuesve të menaxhmentit të Institutit për Arsim Profesional të Hamburgut, ministri Buja ka falënderuar shtetin gjerman për mbështetjen që vazhdimisht po i jep shtetit të Kosovës, e sidomos për përpjekjet që të avanacojë fushën e arsimit profesional në vecanti.

Ministri Buja ka përmendur sfidat me të cilat po ballafaqohet arsimi profesional në Kosovë,  si dhe politikat e arsimit dhe aftësimit profesional.

“Bërja realitet e mësimit gjatë gjithë jetës dhe mobilitetit; Përmirësimi i cilësisë dhe efikasitetit të arsimit dhe aftësimit; Promovimi i barazisë, kohezionit social dhe qytetarisë aktive;Forcimi i kreativitetit dhe inovacionit, duke përfshirë ndërmarrësinë, në të gjitha nivelet e arsimit dhe aftësimit”, ka thënë ministri Buja.

Sipas ministrit Buja, prioritetet e AAP afatshkurtër janë realizimi i praktikës profesionale; kurrikulat, standardet, tekstet dhe vlerësimi; forcimi i lidhjes ndërmjet tregut të punës së Arsimit dhe Aftësimit Profesional; realizimi i praktikës profesionale –bashkëpunimi me ndërmarrjet.

Ministri Buja ka përmendur edhe infrastrukturën ligjore, që po kompletohet, për të pas një sistem të Arsimit dhe Aftësimit Profesinal me standarde të Bashkimit Evropian.

“Krijimi i Agjencisë për AAP dhe krijimi i vijës buxhetore për Arsim dhe Aftësim Profesional dhe Arsim për të Rritur, pajisja e shkollave profesionale dhe lidhja e AAP me tregun e punës, tekstet dhe materialet mësimore, janë sfidat më të mëdha për arsim dhe aftësim cilësor në Kosovë”, thënë ministri Buja, duke cekur disa nga sfidat me të cilat po ballafaqohet sistemi i AAP. Ministri Buja tha se me krijimin e Agjencisë për Arsim dhe Aftësim Profesional, Kosova do të aftësojë njerëz profesionalë jo vetëm për Kosovën, por edhe për tregun evropianë.

Ndërkaq, drejtori i Institutit për Arsim dhe Profesional të Hamburgut, Rainner Schulz, ka thënë se arsimi profesional në Gjermani ka traditë të gjatë. “Shteti dhe firmat private janë të obliguara për kualitetin e shkollimit të të rinjve në bazë të kërkesave eonomike. Shteti dhe ekonomia janë partner për një kualitet për arsimin profesional”, ka thënë ai.

Sipas tij, meqenëse Kosova ka pjesën më të madhe të popullatës të rinj, ndihma e Gjermanisë në arsimin profesional nuk do të mungojë dhe do të bashkëpunojmë ngushtë në shkëmbimin e të rinjve që ata të Kosovë të mësojnë në Hamburg, kurse nxënës të Hamurgut të përcjellin përvojat e tyre te të rinjtë e Kosovës.

Gjatë ditës së sotme ministri Buja dhe delegacioni nga Kosova ka vizituar edhe Korporatën Evropiane për Hapësirë ajrore (Industria Aerobus), si dhe Shkollën Profesionale për prodhim dhe teknologji aviacioni.

Ndryshe, gjatë kësaj vizite, ministri Buja po shoqërohet nga anëtarë të Komisionit Parlamentar për Arsim të Kuvendit të Kosovës,  përfaqësues të Odës Ekonomike të Kosovës, si dhe ambasadori i Kosovës në Gjermani, Skender Gjakaliu.

Delegacioni nga Kosova, gjatë vizitës, po njihet me mënyrën e organizimit dhe funksionimit të arsimit profesional në Hamburg.