Mitrovicë, 6 maj - Gjimnazi “Frang Bardhi”,  ka shënuar sot 70-vjetorin e themelimit, me ç’rast nxënësit e kësaj shkolle kanë hap edhe Panairin tradicional të  Shkencës dhe Kulturës. Në ceremoninë e shënimit të Ditës së Shkollës, mori pjesë edhe kryetari i Komunës, Agim Bahtiri me bashkëpunëtorë.

Në fjalën e tij të rastit, Bahtiri tha se Mitrovica dhe posaçërisht Gjimnazi, gjatë gjithë periudhave të pasluftës së dytë botërore, ka dhënë dijetarë të shumtë në të gjitha fushat e shkencës dhe kulturës, të cilët me punën dhe rezultatet e arritura, kanë bërë emër në gjithë shqiptarinë e më gjerë.

Ai premtoj se, komuna do  t`i mbështet maksimalisht aktivitetet e këtilla apo të ngjashme, si dhe do të bëj gjithçka që është e mundshme, që të krijoj kushte sa më të mira për shkollimin e nxënëseve.

 Duke u ndërlidhur me panairin, Bahtiri shprehu bindjen e tij se gjatë këtyre ditëve të panairit  nuk do të mungojnë vizitorët e shumtë dhe se ata do të ndahen shumë të kënaqur me interpretimet dhe shpjegimet e mrekullueshme që nxënësit do t’u japin gjatë prezantimit të të arriturave të tyre të deritashme, qoftë ato teorike, apo praktike, në fushën e  shkencës dhe të kulturës.

“Është kjo një mundësi e shkëlqyer që ju të ofroni eksperienca nëpërmes punës teorike e praktike, tu tregoni qytetarëve se si punohet sot në shkollat tona, se si mësimdhënësit dhe nxënësit janë të përkushtuar për të arritur sa më shumë dije në procesin e arsimimit dhe edukimit”, tha Bahtiri.

Drejtori i Gjimnazit, Ismet Ferizi, foli për historikun e kësaj vatre të dijes, si dhe të arriturat e gjimnazistëve.