Prishtinë, 13 nëntor - Ministri i Arsimit në detyrë, Ramë Buja, ka kërkuar nga Rektorati i Universitetit të Prishtinës të pranojë në studime rreth 1000 kandidatë të shoqatave të dala nga lufta.

Përmes një vendimi që sapo ka pranuar Rektorati, Buja kërkon që Rektorati i Universitetit të Prishtinës të zbatoj memorandumin të lidhur ndërmjet UP-së dhe Shoqatave të Dala nga Lufta.

Rektori Ramadan Zejnullahu ka konfirmuar për “Zërin” se sapo ka marrë kërkesën.

“Sapo e mora kërkesën. Do ta njoftojë Këshillin Drejtues dhe pastaj do të marrë hapa në përputhje me moralin personal”, ka thënë ai për “Zërin” duke pohuar kështu se mund të pasojë dhe dorëheqja e tij në qoftë se Këshilli vendos për miratimin e kërkesës, që sipas rektorit është shkelje e ligjit.

Ministri i Arsimit në detyrë, Ramë Buja ka kërkuar të mërkurën nga rektori i Universitetit të Prishtinës “Hasan Prishtina”, Ramadan Zejnullahu që të zbatojë duke e quajtur kërkesën e tij vetëm rekomandim.

“Unë dje e kam pasur një takim me rektorin, megjithatë është e tij të veprojë siç do sepse e ka pavarësinë vepruese, por i sugjeroj që të veprojë në mënyrën më racionale që mos ta trazojë institucionin”, ka deklaruar dje Buja, por sot ai i ka dërguar vendim rektorit duke shkel kështu autonominë e UP-së. /Zëri/