BB i jep Kosovës kredi 11 milionë dollarë për sistemin arsimor
Ministri i Financave Avdullah Hoti duke falënderuar Bankën Botërore dhe Ministrinë e Arsimit, Shkencës dhe Teknologjisë për arritjen e kësaj marrëveshje, tha se “Kisha kënaqësinë që së bashku me drejtorin e BB-së sot të nënshkruajmë këtë marrëveshje për përmirësimin e mëtutjeshëm të kushteve në arsim. Kjo është një kredi e cila nga ana financiare është mjaft e përballueshme për buxhetin e Kosovës, me kushte shumë të mira, grejs - periudhë prej 5 viteve, me afat kthimi prej 20 viteve dhe me një ngarkesë për buxhetin e Kosovës që është lehtësisht e përballueshme”.
“Me këtë kredi ne sot e arrijmë vlerën në 88 milionë euro të marrëveshjeve dhe kredive që kemi me Bankën Botërore, në portofolion totale që kemi me BB, në plotë projekte të cilat disa i kemi përfunduar dhe disa prej tyre janë në proces”, bëri të ditur ministri Hoti.
Ndërsa, drejtori i Zyrës së Bankës Botërore në Kosovë Jan Peter Olters u shpreh se është e pa kundërshtuar se thembra e Akilit e ekonomisë së Kosovës është niveli i lartë të papunësisë.
“Për të zvogëluar papunësinë në mënyrë të qëndrueshme, për të transformuar ekonominë e Kosovës dhe për të rritur potencialin rritës, vendi duhet të zbatojë reformat për të përmirësuar në mënyrë të qëndrueshme situatën në energji, klimën e biznesit dhe arsimin”, tha drejtori i Zyrës së Bankës Botërore në Kosovë.
Ai më tej shtoi se “ Për këtë arsye, nënshkrimi i sotëm i Projektit për Përmirësimin e Sistemit të Arsimit të Kosovës është një intervenim me rëndësi kritike për të ju siguruar të rinjve të Kosovës mundësi për të qenë të suksesshëm në tregun e punës”.
Ministri i Arsimit, Shkencës dhe Teknologjisë Arsim Bajrami, theksoi se kjo kredi i mundëson Qeverisë së Kosovës të përmirësojë cilësinë në të gjitha nivelet e arsimit.
“Kredia kap shumën prej 11 milionë dollarëve, prej të cilave 10 milionë dollarë i dedikohen arsimit parauniversitar dhe 1 milionë dollarë për arsimin e lartë. Investimi nga kjo kredi do të bëhet tek forcimi i autonomisë së shkollave, trajnimi i mësimdhënësve, ngritja e cilësisë së mësimdhënies si dhe ngritja e cilësisë së kurrikulave. Gjithashtu kjo kredi po vjen në kohën e duhur dhe po përputhet plotësisht me zotimet e Qeverisë për të përmirësuar cilësinë në sektorin e arsimit të lartë dhe atë parauniversitar”, shtoi ministri Arsim Bajrami.
