Prishtinë, 13 qershor - Departamenti i Aleancës për Ardhmërinë e Kosovës për Arsim, së bashku me Grupin Parlamentar dhe strukturat tjera profesionale brenda degëve, ka analizuar rrjedhat në arsim dhe ka dalë me konstatime të bazuara.

Këto konstatime i kanë përcjellë në një konferencë për media, sot, kryesuesi i Departamentit të AAK-së për Arsim, Jonuz Salihaj dhe deputetja e AAK-së, Teuta Haxhiu. 

Salihaj ka thënë së themelimi i një forumi arsimor gjithëpërfshirës të institucioneve dhe organizatave të ndryshme vendore e ndërkombëtare, për të siguruar se Kosova do të marrë vendime të qëlluara politike afatgjate, për të garantuar një sistem arsimor efektiv.

Forumi sipas tij do të garantonte mbështetje të fuqishme politike dhe konsensus politik për depolitizimin e arsimit.


\"Nuk mund të flitet për një sistem efektiv arsimor, pa garantimin e një sistemi unik, gjithëpërfshirjen në arsimin parauniversitar dhe pa sigurimin e mekanizmave efikasë të monitorimit dhe vlerësimit\", ka theksuar Salihaj.

Deri më tani sipas tij janë hartuar strategji të shumta për të gjitha nivelet e arsimit, është aprovuar një Kornizë e Re Kurrikulare për arsimin parauniversitar, janë bërë ndryshime të legjislacionit arsimor, por asgjë nuk po jetësohet në praktikë.

Po ashtu siç ka thënë Salihaj shkalla e anlfabetizmit po rritet,  fenomeni i braktisjes së shkollës ka marrë përmasa shqetësuese, cilësia e arsimit kurrë nuk ka qenë më e ultë, karakteri edukativ i arsimit gjithnjë e më shumë po venitet, sepse ky sistem arsimor në asnjë nivel nuk prodhon vlerën shtesë.

\"Garantimi i mekanizmave efikasë për inspektimin e arsimit publik dhe privat dhe rishikimi i procesit të licencimit dhe akreditimit të institucioneve arsimore.\"

\"Ky proces është shumë emergjent në nivelin e arsimit parashkollor, në sektorin privat dhe në arsimin e lartë publik dhe privat\", theksoi ai.

AAK mbështetë përpjekjet e Grupit tonë Parlamentar për ndryshimin e Ligjit për Inspektoratin Arsimor dhe do të angazhohet me të gjithë potencialin që kjo të realizohet në kohë rekorde.

Nderkaq deputetja Haxhiu ka thënë se është domosdoshmeri formimi dhe funksionalizimi i Qendrës Nacionale për Vlerësimin e Jashtëm.

\"Tani të gjithë jemi të bindur se mekanizmat e vlerësimit efikas të sistemit arsimor nuk ekzistojnë. Kjo po konfirmohet vazhdimisht, që nga viti 2008, pasi  që procesi i vlerësimit, në përgjithësi  e, posaçërisht, vlerësimi i jashtëm, paraqet pikën më të dobët të sistemit tonë edukativo-arsimor.\"

\"MASHT, në vend që të merr hapa konkretë për ndryshime rrënjësore në këtë proces, kënaqet me ndërmarrjen e disa hapave kozmetikë, duke paralajmëruar dënimin e tre administratorëve gjatë procesit të administrimit të Testit të Maturës Shtetrore\", ka theksuar Haxhiu.

Edhe Ligji për Maturën Shtetërore sipas saj është diskriminues për shkollat profesionale, që paraqesin 60-përqindëshin e maturantëve dhe, si i tillë, duhet t’iu nënshtrohet ndryshimeve të thella. 

Ndryshimi i rrjetit të shkollave profesionale dhe institucioneve të arsimit të lartë paraqet një tjetër prioritet programor të AAK-së.

\"Të gjithë e dimë se rrejti i shkollave profesionale dhe institucioneve të arsimit të lartë, është në shpërputhje totale me kërkesat e tregut të punës në Kosovë.\"

\"Kosova ka potenciale të fuqishme në energjetikë dhe miniera, në bujqësi dhe veterinari, në kimi dhe jometale, por numri i nxënësve dhe studentëve në këta lëmenj është simbolik\", ka theksur deputetja Haxhiu. 

AAK sipas saj angazhohet për t’iu siguruar mësimdhënësve statusin profesional, status ky i cili është i domosdoshëm për të realizuar synimin për një shoqëri të arsimuar, pa diskriminim dhe jotolerancë. Prandaj, aftësimi i vazhdueshëm i mësimdhënësve është prioritet kyç për AAK-në.

\"Ne jemi të shqetësuar me procesin e abuzimit me vende të punës nga disa drejtori komunale të arsimit, duke fshehur normat e orëve për militantët partiakë dhe duke i eliminuar profesionalistët, të cilët po pësojnë për shkak se mendojnë ndryshe nga militantët e partive në pushtet\", theksoi ajo.