Prishtinë 23 mars - Gjimnazi “Hasan Nahi”, në kuadër të Fondacionit për Arsim dhe Kulturë “Atmosfera”, organizon edicionin e gjashtë me radhë - Garën e Inteligjencës "EUREKA 6".

Në mesin e rreth 2000 nxënësve, janë përzgjedhur 255 finalistë nga 27 Komuna të Kosovës, të cilët do të garojnë në fazën finale të Garës Eureka 6, e cila do të mbahet sot në ambientin e Gjimnazit “Hasan Nahi” në Prishtinë. 

Më datën 15 Dhjetor 2018, është mbajtur në të gjithë Kosovën në shkollat e përcaktuara nga Komunat përkatëse testi i fazës së parë të kësaj gare tashmë tradicionale, të miratuar dhe të përkrahur nga Ministria e Arsimit e Shkencës dhe e Teknologjisë si dhe DKA-të (Drejtoritë Komunale të Arsimit) në të gjithë Kosovën.

Gara EUREKA 6 sfidon dijen e rreth 2000 nxënësve më të mirë nga e gjithë Kosova, të përzgjedhur nga Klasat e 9-ta nga 27 komuna të ndryshme të Kosovës.