Tiranë, 8 korrik - Ministria e Turizmit të Shqipërisë ka bërë të ditur se 1.2 milionë turistë e kanë vizituar Shqipërinë gjatë 6-mujorit të parë të këtij viti.

Zëvendësministrja e Turizmit, Suzana Turku tha sot se është rritur me 39 për qind numri i turistëve të huaj që vizitojnë Shqipërinë, krahasuar me të njëjtën periudhë të një viti më parë. Edhe të ardhurat nga turizmi kanë shënuar rritje me 8.5% më shumë.

Znj.Turku tha se objektiv i Ministrisë së Turizmit është zhvillimi i turizmit të qëndrueshëm dhe shndërrimi i tij në degë kryesore të ekonomisë shqiptare.  Numrin më të madh të vizitorëve në Shqipëri e zënë ata kosovarë dhe maqedonas.