Londër, 11 prill - Vetura luksoze Bugatti Veyron Super Sport ka humbur titullin e veturës më të shpejtë nga prodhimtaria serike, të lejuar në komunikacionin rrugor.

Këtë njoftim e ka bërë të martën organizata e rekordeve të Guinnessit.

Kjo veturë kishte arritur rekordin e shpejtësisë prej 431 kilometrash në orë pa kufizuesin elektronik të shpejtësisë.

Një kufizues i tillë zakonisht është i instaluar dhe i aktivizuar në të gjitha veturat që prodhohen në mënyrë serike.

Me këtë modifikim, ndërkaq, vetura nuk konsiderohet më si serike dhe në këtë mënyrë nuk vlen as rekordi.

Prodhuesit e Bugattit reagojnë se kufizuesi elektronik i shpejtësisë ka qenë i çaktivizuar nga ky lloj i Bugattit në kohën kur Guinness i kishte njohur rekordin Bugattit.

Me humbjen e rekordit nga Bugatti, atë e fiton vetura amerikane Hennessey Venom GT, që zhvillon shpejtësi 427 kilometra në orë.