Prishtinë, 7 dhjetor - Telekomi i Kosovës, Vala, ka krijuar një superprodukt për vendet që frekuentohen nga numër i madh i qytetarëve si lokalet e natës, diskotekat, pub-et, etj, kampuset universitare dhe pikat e tjera të grumbullimeve masive si sheshet, stadiumet, etj.

Ky produkt, iu mundëson qindra mijëra personave të kenë internet super të shpejtë në të njejtën kohë dhe është testuar në diskotekën e njohur të Prishtinës, Zone Club

Superprodukti,  ka të bëjë me implementimin e teknologjisë së fundit WIFI profesional, për të gjithë klientët e Telekomit të Kosovës, Vala, të cilët përdorin internetin e shpejtë 3G dhe 4G.

Telefoni i tyre do të lidhet automatikisht me WIFI-n profesional të instaluar nga Telekomi i Kosovës, Vala, pa u vërejtur fare nga klienti, apo pa pasur nevojë të kryejë operacione tjera në telefon.

Petrit Kllokoqi, pronar i diskotekës së njohur Zone Club, në lokalin e të cilit u testuar WIFI profesional, tha se produkti i lansuar nga Telekomi i Kosovës është pëlqyer jashtëzakonisht shumë nga klientët e Vala-s.

“Vazhdimisht kemi pasur probleme me kyqjen në internet të personave që dalin dhe kalojnë natën në lokal. Kjo për shkak të internetit të dobët, pasi është dëshirë kryesore e njerëzve që të komunikojnë me njerëz brenda dhe jashtë lokalit. Me instalimin e WIFI profesional nga ana e Telekomit të Kosovës, kemi një internet super të shpejtë, pavarësisht se mund të jenë të kyqur 1 mijë e më shumë persona njëkohësisht. Ështe një produket që na ndihmon shumë që klientët tanë të ndihen mirë\", tha njëri prej pronarëve të Zone Club, Petrit kllokoqi.

Në fakt, këtë lloj interneti, me shpejtësi prej 100 MB për sekondë, qytetarët e Kosovës nuk e kanë shijuar as në shtëpitë e tyre, ku e kanë të instaluar Wifi-n.

“Është një produkt i jashtëzakonshëm që kemi lansuar për vendet që kanë grumbullim masiv të qytetarëve. Produkti është testuar tanimë në Zone Club dhe i kemi dhënë dritën jeshile për t\'u shtrirë për të gjithë klientët e tjerë të interesuar. Të gjithë klientët e Telekomit të Kosovës, Valës që kanë qenë në Zone Club gjatë dy javëve të fundit, kanë pasur rastin të kënaqen më internetin më të shpëjtë\", tha Drejtori  Menaxhues i Telekomit të Kosovës, Agron Mustafa.

Sipas tij, ky produkt do të shtrihet në qindra pika të tjera në Prishtinë, Brezovicë dhe qendrat e tjera regjionale.

“Tani do ta mbulojmë Brezovicën dhe më pas gjithë Kosovën. Do të kemi internetin më të shpejtë të 3G dhe 4G në regjion e më gjërë\", theksoi Drejtori Menaxhues i Telekomit të Kosovës, Vala, Agron Mustafa.

 Telekomi i Kosovës, Vala ka arritur në fazën e fundit të projektit WIFI Offload, fazë e cila pritet të kryhet në më pak se një muaj në Prishtinë, ku do të instalohen mbi 500 pika, për t\'u shtrirë më pas në të gjithë Kosovën.