Prishtinë, 18 nëntor - Kryetari i komunës, Agim Bahtiri, ka pritur Agim Shahinin, kryetari  i Aleancës Kosovare të Bizneseve dhe përfaqësuesin e Kompanisë holandeze “Terra Stab”, Maarten Maas, me të cilët ka biseduar për mundësitë e bashkëpunimit të ndërsjelltë.

Fillimisht kryetari Bahtiri e ka falënderuar Shainin për interesimin e tij për të pru në Mitrovicë biznesmenë të ndryshëm për të investuar dhe përfaqësuesin e Kompanisë holandeze “Terra Stab”, Maarten Maas, për gatishmërinë e tij për të bashkëpunuar me komunën e Mitrovicës dhe realizimin e projekteve në fushën e infrastrukturës.

Kryetari Bahtiri ka thënë në vazhdim se komuna e Mitrovicës i mirëpret të gjitha iniciativat dhe të gjithë biznesmenët që janë të interesuar për të bashkëpunuar me komunën e Mitrovicës dhe për këtë po punon shumë në krijimin e infrastrukturës përkatëse dhe lehtësirave tjera për biznese.

Përfaqësuesi i Kompanisë holandeze “Terra Stab”, Maarten Maas, që është një kompani e fuqishme e specializuar për infrastrukturën rrugore nga Holanda dhe që ka angazhime në shumë vende të botës,  e ka njoftuar kryetarin Bahtiri me punën që bënë dhe kushtet që ajo ofron për të realizuar projekte të ndërtimit të rrugëve me teknologjinë më bashkëkohore në botë.

Kryetari i komunës, Bahtiri dhe kryetari i AKB-së, Agim Shahini e kanë njoftuar biznesmenin Maas me infrastrukturën ligjore dhe me procedurat e regjistrimit të bizneseve dhe procedurat tjera për angazhim në projekte konkrete.

Përfaqësuesi i Kompanisë holandeze “Terra Stab”, Maarten Maas, tha se do të sjell në Mitrovicë dhe Kosovë ekspertët e kompanisë për të bërë hulumtime të terrenit ku mund të ndërtohen rrugë të reja, apo të meremetohen ato të vjetra.

Që të tre bashkëbiseduesit u dakorduan që  selia e përfaqësisë së  Kompanisë holandeze “Terra Stab”, të jetë në Mitrovicë, ku ofrohen kushte më të mira për veprimtarinë e bizneseve dhe kompanive të ndryshme.