Prishtinë, 1 korrik - Ministria e Infrastrukturës dhe kompania Bechtel Enka, sot do të nënshkruajnë kontratën për ndërtimin e Autostradës Prishtinë-Hani i Elezit.

Një burim brenda qeverisë së Kosovës, i ka thënë gazetës “Epoka e re” se, të gjitha procedurat ligjore janë kryer dhe sot pritet të nënshkruhet kontrata për ndërtimin e Autostradës Prishtinë-Hani i Elezit.

Qeveria e Republikës së Kosovës të hënën ka miratuar vendimin për miratimin e rekomandimeve të Komitetit Drejtues Ndërministror për ndërtimin e Autostradës  Prishtinë - Hani i Elezit.

Me këtë vendim ka autorizuar Ministrinë e Infrastrukturës që ta nënshkruajë kontratën për ndërtimin e Autostradës  Prishtinë - Hani i Elezit dhe gjithashtu obligon të gjitha ministritë dhe institucionet e tjera përgjegjëse të Republikës së Kosovës t’i ndërmarrin të gjitha veprimet konform detyrave dhe përgjegjësive bazuar në legjislacionin në fuqi për zbatimin e këtij vendimi.

Kryeministri  Hashim Thaçi në profilin e tij në “Facebook” ka shkruar dje se po vazhdojnë me “Misionin e Ri” për ndërtimin e infrastrukturës dhe zhvillimin e vendit.

“Qeveria sapo e aprovoi rekomandimin për ndërtimin e autostradës Prishtinë - Shkup. Vazhdojmë me ‘Misionin e Ri’, ndërtimin e infrastrukturës, zhvillimin e Kosovës dhe krijimin e vendeve të reja të punës”, ka shkruar Thaçi në “Facebook”.