Prishtinë, 11 shtator - Punëtorët e ndërmarrjes publike Posta e Kosovës të cilët ndodhen në grevë që nga e hëna kanë marrë sot mbështetje nga Sindikata e Bashkuar e Arsimit, Shkencës dhe Kulturës e Republikës së Kosovës (SBASHK).

Kryetari i SBASHK-ut, Rrahman Jasharaj dhe anëtari i kryesisë Ymer Ymeri gjatë një vizite në Postën e Kosovës janë takuar me kryetarin e Sindikatës së Punëtorëve të Postës së Kosovës, Etrit Hoti dhe anëtarin e kryesisë Faton Morina. Ata gjithashtu kanë vizituar punëtorët grevistë në Prishtinë.

Kryetari Hoti i ka njoftuar sindikalistët e SBASHK-ut me gjendjen në Postën e Kosovës,  kërkesat e punëtorëve si dhe për hapat e mëtejmë sindikal që do të ndërmerren për realizimin e të gjitha kërkesave.

Udhëheqësit e SBASHKU-ut janë solidarizuar me grevën e punëtorëve të Postës e filluar dy ditë më parë dhe kanë  shprehur përkrahje të plotë për kërkesat e punëtorëve të ndërmarrjes sonë duke i cilësuar ato të drejta dhe të ligjshme.

Kryetari Hoti ka falënderuar përzemërsisht kryetarin Jasharaj dhe të gjithë anëtarët e SBASHK-ut për mbështetjen e ofruar në ditët më të vështira nëpër të cilat po kalon Posta e Kosovës.