Rritet numri i udhëtarëve që e kanë shfrytëzuar aeroplanin

Prishtinë, 5 maj - Agjencia e Statistikave të Kosovës (ASK) ka publikuar Statistikat e Transportit dhe Telekomunikacionit pwr TM1 2015, me të dhëna mbi Transportin Ajror, Hekurudhor dhe Postë Telekomunikimin.
Në territorin e Kosovës kemi gjithsej 333 km binarë hekurudhorë për transport dhe 110 privat, derisa qarkullojnë 8 lokomotiva disel, të cilat bartin 27 vagonë, 9 të udhëtarëve dhe 18 për bagazh.
Numri i pasagjerëve që kanë shfrytëzuar trenin si mjet udhëtimi, në TM1 2015 është 67 mijë, e që krahasuar me tremujorin e parë të vitit 2014, vërehet se numri i udhëtarëve është ulur për 26.77%.
Derisa e kundërta ndodh me shfrytëzimin e trenit, si mjet për transportin e mallrave, ku gjatë kësaj periudhe shënon 201 mijë tonw sasi të mallrave, e që në raport me tremujorin e njëjtë të vitit të kaluar ka shënuar një ngritje prej 26.79%.
Numri i fluturimeve në TM1 2015 është 1 269 ose 3% më shumë se në tremujorin e njëjtë të vitit të kaluar, TM1 2014.
Numri i udhëtarëve, që e kanë shfrytëzuar aeroplanin, si mjet transporti, në këtë tremujor (TM1 2015) është rreth 295 mijë, ku krahasuar me tremujorin e njëjtë të vitit të kaluar (TM1 2014) kemi një rritje për 9.09 %.