Prishtinë, 21 mars - Kryetari i Komunës së Mitrovicës, Agim Bahtiri, ka pritur të premten në takim përfaqësuesit e Ministrisë së Infrastrukturës të Kosovës, më të cilët bisedoi rreth  rregullimit të transportit publik në Komunën e Mitrovicës.

Palët u dakorduan që të bashkëpunojnë për vendosjen e rendit dhe rregullit në këtë drejtim.
Drejtori i Inspektoratit në Ministrinë e Infrastrukturës, Qerkin Dekolli, kërkoi nga Komuna  e Mitrovicës që të merr të gjitha masat që Ligji për Transportin Publik të respektohet.

“Ne dëshirojmë që të kemi një bashkëpunim sa më të afërt me ju, që Ligji i cili është miratuar në Kuvendin e Kosovës të respektohet”, ka thënë Dekolli.
Në anën tjetër, kryetari i Komunës së Mitrovicës, Agim Bahtiri,  ka shprehur vullnetin e tij  që ky Ligj të respektohet në përpikëri.

“E di që do të ketë edhe kundërshtime, por një Ligj i tillë, i cili është  miratuar edhe në Kuvendin e Kosovës duhet të zbatohet”, tha ai, duke bërë të ditur se prej të hënës do të ndalohet qarkullimi i kombibusëve.

Bedri Ferati nga Drejtoria e Inspeksionit në Komunën e Mitrovicës, ka kërkuar nga Ministria e Infrastrukturës që të mbikëqyrë implementimin e këtij ligji.

Sipas tij Policia e Kosovës duhet që të ndërmerr masa ndaj shkelësve të ligjit. “Ne jemi të gatshëm që të zbatojmë ligjin në përpikëri, mirëpo ka shumë vështirësi”, tha ai.