Vermicë, 6 gusht - Pikëkalimi kufitar i Morinë -Vermicë që lidh Shqipërinë me Kosovën vazhdon të mbajë vendin e parë për numrin e hyrje-daljeve të shtetasve, madje me një epërsi të thellë, krahasuar me pikëkalimit e tjera kufitare, duke lënë mbrapa pikëkalime si Portin e Durrësit, Aeroportin e Rinasit, por edhe vendkalimet kufitare tokësore si  ato të Kakavijës në Gjirokastër dhe Kapshticës në Korçë, në kufi me Greqinë.

Policia kufitare e rajonit të Kukësit ka bërë të ditur numrin e kalimit të shtetasve nga Kosova, të cilët emërtohen me termin “të huaj” për shkak të përllogaritjeve për efekte statistikore.

Zëdhënësi i Drejtorisë së Policisë së Qarkut të Kukësit, Mirjan Hoxha, ka bërë të ditur për “Kohën Ditore” se gjatë muajit korrik janë llogaritur të kenë hyrë në Shqipëri 418.167 shtetas nga Kosova dhe të tjerë shtetas të huaj dhe kanë dalë nga Shqipëria duke hyrë në Kosovë 266.384 shtetas nga Kosova dhe shtetas të tjerë të emërtuar “të huaj”.

Numri i automjeteve që ka shoqëruar këta shtetas ka qenë 69.991 në hyrje dhe 80.056 në dalje.

Ndërkohë që është rritur edhe numri i shtetasve nga Shqipëria që kanë vizituar Kosovën gjatë muajit korrik.

Në bazë të të dhënave të policisë kufitare në Kukës, numri i shtetasve nga Shqipëria që kanë hyrë në Kosovë për muajin korrik është 75.126 persona me 26.314 automjete, ndërsa kanë dalë nga Kosova për muajin korrik përmes Morinit 34.592 shtetas me 15.956 automjete.

Shifrat e hyrjes në Shqipëri të shtetasve nga Kosova për muajin korrik flasin për një rritje prej 10% më shumë se viti kaluar. Në korrik të vitit 2011 kanë hyrë në Shqipëri rreth 380 mijë shtetas nga Kosova.