Miratohet vendimi për transportin rrugore mes Kosovës e Bullgarisë
Vendimi obligon Ministrinë e Infrastrukturës që të zhvillojë negociatat me autoritetet e Qeverisë së Bullgarisë me qëllim të finalizimit të kësaj marrëveshjeje, në përputhje me legjislacionin në fuqi.
Në mbledhjen e sotme, Qeveria e Republikës së Kosovës ka miratuar edhe vendimin për shqyrtimin e mëtejmë të kërkesës për shpronësimin e pronave të paluajtshme të cilat preken nga ndërtimi i autostradës Prishtinë - Hani i Elezit, në zonat kadastrale të komunave Graqanicë, Lipjan, Ferizaj dhe Kaçanik.
Kabineti qeveritar ka aprovuar vendimin për aprovimin e kërkesës së “NEW CO FERONIKELI COMPLEX L.L.C.” – Gllogoc, për dislokimin e rrugës rajonale R120, segmenti Sllatinë-Magurë, pjesa nga fshati Medevc deri në hyrje të Magurës në Komunën e Lipjanit.
Kryeministri tha se vendimi është mjaft i qartë. “Në pikën e dytë të vendimit është thënë që dislokimi i këtij segmenti nuk mund të krijoj implikime buxhetore në aspektin pronësor-juridik, shpronësimet dhe ndërtimin e këtij segmenti rrugor, prandaj ajo që ne bëjmë është vetëm i rekomandojmë Ministrisë së Infrastrukturës që në pajtim me ligjin të ndërmerr veprimet e nevojshme”, tha kryeministri.
