Prishtinë, 24 gusht - Në praninë e kryeministrit të Qeverisë së Kosovës Hashim Thaçi, dhe kreyeminstres së Kroacisë, Jadranka Kostor, ministri i Infrastrukturës, Fehmi Mujota dhe homologu i tij nga Kroacia Duro Popijaç, nënshkruan marrëveshjen ndërkombëtare për transportin rrugor të udhëtarëve dhe mallrave.
 
Njëherit, kjo është marrëveshja e parë ndërkombëtare që po nënshkruhet mes dy shteteve, përkatësisht në mes të Republikës së Kosovës dhe Republikës së Kroacisë, thuhet në njoftimin e Ministrisë së Infrastrukturës.

Me këtë marrëveshje rregullohet transporti rrugor ndërkombëtar i udhëtarëve, mallrave si dhe transporti transit, nëpër territorin shtetëror të palëve kontraktuese, në këtë rast Republikës së Kosovës dhe Republikës së Kroacisë.

Qëllimi kryesor i kësaj marrëveshje qëndron në faktin se përmes kësaj: promovohet bashkëpunimi në transportin ndërkombëtar në suaza të ekonomisë së tregut, lëvizjës së lirë të njerëzve dhe mallrave, avansohet zhvillimi i tregtisë së lirë dhe marrëdhëniseve ekonomike ndërmjet dy shteteve, Shtohet niveli i sigurisë në komunikacionin rrugor dhe lehtësohen procedurat administrative dhe eleminohen të gjitha barrierat që eventualisht janë paraqitur si pengesa administrative për kompanitë transportuese të të dyja vendeve.