Prishtinë, 1 prill - Konfederata Ndërkombëtare e Sindikatave (ITUC) ka reaguar pas gjendjes së krijuar në RTK, si pasojë e përjashtimit nga puna të kryetarit të Sindikatës së Pavarur të RTK-së Fadil Hoxha dhe nënkryetarit Arsim Halili, nga drejtori i përgjithshëm i RTK-së, Mentor Shala.

Në një përgjigje të dërguar në adresë së Sindikatës së Pavarur të RTK-së, Zëvendës sekretari i Përgjithshëm i Konfederatës Ndërkombëtare të Sindikatave, Jaap Wienen i ka cilësuar përjashtimet nga puna të kryesindikalistëve, shkelje flagrante të të drejtave sindikale.

“ Ju falënderoj për informacionin tuaj që raporton vërtet një shkelje flagrante të të drejtave sindikale” ka theksuar Wienen duke shtuar se lidhur me këtë çështje është njoftuar edhe Bashkimi i Sindikatave të Pavarura të Kosovës.