Gjakovë, 27 janar - Sot është inauguruar rrethrrotullimi i ri në Gjakovë, projekt ky i cili ka finalizuar bashkëpunimin e suksesshëm në mes projektit DEMOS dhe Komunës së Gjakovës.

Ndërtimi i këtij rreth rrotullimi ka ardhur si rezultat i vlerësimit të nevojave dhe identifikimit të intervenimeve të mundshme në hapësirat publike dhe infrastrukturën rrugore të Gjakovës.  

Ky projekt është mundësuar nga fondet e përbashkëta të projektit DEMOS dhe Komunës së Gjakovës, e cila arrin shumën e përgjithshme prej 116,357.98 euro.

Në këtë inaugurim ka marrë pjesë Kryetarja e Komunës së Gjakovës, Mimoza Kusari Lila, bashkë me përfaqësues komunal si dhe menaxheri i projektit DEMOS, Norbert Pijls, me bashkëpunëtorë.

Në fjalën e saj, kryetarja Mimoza Kusari Lila, është shprehur se rrethrrotullimi i përuruar, lidhë pjesë të rëndësishme të qytetit sidomos hyrjen e qytetit nga magjistralja Prishtinë - Gjakovë.

“Komuna e Gjakovës është njëra prej komunave përfituese nga projekti DEMOS, e cila përpos investimeve në infrastrukturë ofron edhe asistencën teknike, dhe projekte të tilla pritet të vazhdojnë edhe në vitin 2016”.

Kryetarja Kusari Lila në fund ka shprehur falënderimet e veçanta për përkrahjen e vazhdueshme gjatë këtyre dy viteve nga projekti DEMOS, gjithnjë duke pasur në mirëkuptim kërkesat e Komunës së Gjakovës të cilat hartohen në bazë të domosdoshmërisë së prioriteteve për qytetarët e komunës.

Nga ana tjetër, menaxheri i projektit DEMOS, Norbert Pijls, është shprehur se “qëllimi ynë me financimin e këtij rrethrrotullimi është që ti mundësojmë Komunës së Gjakovës që dukshëm të përmirësojnë trafikun dhe infrastrukturën rrugore."

"Qëllimi tjetër është që granti të shfrytëzohet për trajnimin e zyrtarëve komunalë në dizajnimin, tenderimin dhe monitorimin më të mirë të projekteve. Shpresojmë se kjo do tu ndihmojë investimeve të ardhme të komunës”.