Gjakovë, 18 gusht - Në kuadër të investimeve në ndërtimin dhe rregullimin e infrastrukturës në zonat rurale si dhe në realizimin e projekteve që nderojnë dëshmorët e kombit, kryetarja e Komunës së Gjakovës, Mimoza Kusari Lila, sot ka bërë përurimin e katër rrugica të fshatit Ponoshec, si dhe nismën e punimeve në projektin për rregullimin e varrezave të dëshmorëve të këtij fshati.

Me rastin e përurimit të rrugicave në gjatësi prej 841 metrave, Komuna e Gjakovës ka investuar në shumë prej mbi 50 mijë euro, ndërsa në realizimin e projektit për varrezat e dëshmorëve do të investohen me mjetet e buxhetit komunal në shumë prej 16 mijë euro.

Kryetarja e Komunës, Mimoza Kusari Lila, është shprehur se ndjehet tejet e lumtur që po investohet në realizimin e projekteve shumë të rëndësishme në mirëqenien e banorëve të zonave rurale, ku po ju ofrohet mundësi më e mirë dhe qasje më e lehtë për investime tjera zhvillimore.

Njëkohësisht, kënaqësi e veçantë është edhe realizimi i projektit shumë të ndjeshëm, siç rregullimi i varrezave të dëshmorëve të kombit. Kryetarja Mimoza Kusari Lila ka përmendur edhe projektin e ujësjellësit në Rekë të Keqe, që pritet të kryhet brenda vitit të ardhshëm, si dhe mundësinë e investimeve në projekte tjera në fshatin Ponoshec dhe në fshatrat tjerë përreth.

Hysni Ademi, në emër të banorëve të fshatit ka falënderuar Kryetaren e Komunës për projektet që i ka dedikuar për Ponoshecin, e posaçërisht që po u bën nderimin e duhur dhe të merituar dëshmorëve.

Ndërsa, Mirdita Ademaj, asambleiste komunale është shprehur se kjo është një shenjë pozitive se do të realizohet në tërësi projekti i varrezave të dëshmorëve, si dhe i rrugëve tjera të fshatit.

Më tutje, Hidajete Dula, nëna e dëshmorit të kombit, Mehmet Dula ka falënderuar Komunën e Gjakovës dhe kryetaren Mimoza Kusari Lila, për këto investime që po bënë dhe për respektin ndaj dëshmorëve të rënë për këtë vend.

Punimet në rregullimin e varrezave të dëshmorëve të kombit në fshatin Ponoshec pritet të kryhen brenda dhjetë ditëve.