Prishtinë, 6 nëntor - Haldun Firat Kokturk përzgjedhet Drejtor i ri Gjeneral në Aeroportin Ndërkombëtar të Prishtinës “Adem Jashari”.

Kokturk karrierën e tij e filloi si Inxhinier në fazën e ndërtimit dhe operimit në “Zonguldak International Airport”.

Kokturk shërbeu si menaxher projekti dhe menaxher i ndërtimit në disa projekte të ndryshme duke përfshirë projekte në sektorin e energjisë, turizmit dhe shumë projekte në aviacion dhe transport ajror.

Kokturk ishte i angazhuar si udhëheqës i Ndërtimit të Terminalit dhe Komisionit të Pranimit në Limak-GMR JV “Istanbul Sabiha Gokcen Airport” me kapacitet prej 25 milion pasagjerësh.

Për më shumë, Kokturk ka menaxhuar procesin e tranzicionit të terminalit të ri “Istanbul Sabiha Gokcen Airport”.

Haldun Firat Kokturk ka dëshmuar cilësi dhe përkushtim duke përfunduar projektin e ndërtimit të Aeroportit Ndërkombëtar të Prishtinës “Adem Jashari” në cilësinë e Kryeshefit për Zhvillim në kuadër të grupit të Limak Kosovo të ndërmarrjeve dhe është autor i master planit të terminalit të ri të Aeroportit “Adem Jashari”.

z. Kokturk është Magjistër i Shkencave në Fushën e Ndërtimtarisë dhe ka të përfunduara trajnime të shumta dhe është posedues i një numri të shumtë të certifikatave në fushën e aviacionit civil duke përfshirë sigurinë, menaxhmentin dhe shumë fusha tjera.

Përgjatë viteve z. Kokturk është dëshmuar të jetë i përgatitur profesionalisht në menaxhimin e kontratave, vlerësimin dhe menaxhimin e kostove, planifikimin, menaxhimin dhe zhvillimin e aeroporteve, në fushën e aviacionit civil dhe menaxhimit buxhetor.

Me përzgjedhjen e z. Haldun Firat Kokturk në pozitën e Drejtorit Gjeneral të Aeroportit Ndërkombëtar të Prishtinës “Adem Jashari”, edhe njëherë dëshmojmë përkushtimin tonë për të ofruar cilësi të lartë të shërbimeve për të gjithë udhëtarët.

Ndërkaq Drejtori Gjeneral i mëparshëm Mertol Genc do të vazhdojë të jetë pjesë e Limakut  dhe të jap kontributin e tij si anëtar i Bordit të Limakut poashtu do të jetë i angazhuar edhe në projekte tjera investuese në vazhdim e sipër në grupin Limak.

Aeroporti Ndërkombëtar i Prishtinës ‚Adem Jashari‘ është gati për të thyer kufinjtë në fushën e transportit ajror, është gati për t’u bërë konkurrent me të gjitha aeroportet në rajon dhe më gjerë, Aeroporti Ndërkombëtar i Prishtinës ‚Adem Jashari‘ është gati për botën!