Prishtinë, 19 korrik - Posta e Kosovës ka bërë të ditur se Filatelia e Postës ka emetuar të enjten emisionin e ri të pullave postare, të  titulluar ”Pamjet e fshatrave nga Kosova”.

Përmes tri imazheve të pullave postare,  Filatelia e Postës  prezanton fshatrat: Lluka e Epërme, që njihet si njëri ndër fshatrat më të vjetër në Dukagjin ; Opoja, që shquhet për bukuri të rralla natyrore si dhe  Stublla e Epërme (Viti), vendbanim historik që daton nga shekulli  XV.

Kosova ka gjithsej 1268 fshatra, të cilat joshin nga bukuria piktoreske turistët e shumtë. Përpos bukurisë natyrore këto fshatra ruajnë vlera historike dhe kulturore të ndërtesave të vjetra, ku disa sosh ende janë të banueshme.

Filatelia e Postës edhe në të ardhmen do të prezantojë bukuritë dhe vlerat e ndryshme të vendbanimeve në Kosovë.