Mitrovicë, 29 prill - Kanë filluar punimet për rirregullimin e rrethrrotullimit afër lumit Lushta.  NN “Euro ndërtimi”, përfituese e tenderit në vlerë prej 31.274 euro, për rregullimin e rrethrrotullimit ka filluar të hënën punët për zgjerimin e korsive përreth rrethrrotullimit. 

Rirregullimi i këtij rrethrrotullimit, është duke u bërë me kërkesën e qytetarëve dhe të policisë së Kosovës, për shkak se ai aktualisht nuk është funksional sa duhet, përkatësisht është pengesë për qarkullimin normal të automjeteve.

Me projektin e ri, parashihet, që të trija rrugët që shpijnë në rrethrrotullim, të kenë nga dy korsi, në vend nga një që kanë aktualisht. Deri tash në rrethrrotullim, për shkak të ngarkesave të mëdha, krijoheshin tollovi dhe radhë të gjata, gjë që automatikisht ndikonte edhe në vonesa të mëdha e humbje kohe.

Kryetari i Komunës, Agim Bahtiri, ka vizituar punëtorët e NN “Euro ndërtimi”, për tu njoftuar nga afër se si po shkojnë punët dhe për tu njoftuar drejtpërsëdrejti me projektin i cili duhet të realizohet.

Ai i ka inkurajuar punëtorët që të punojnë mirë e shpejtë dhe që punët të kryhen me kohë dhe sipas kontratës.

Po ashtu, kryetari Bahtiri ka kërkuar punë cilësore dhe kujdes të shtuar, në mënyrë që rrethrrotullimi të funksionoi edhe gjatë kohës së kryerjes së punëve pa shkaktuar probleme të mëdha në trafik dhe në lëvizjen e qytetarëve.