Mitrovicë, 12 gusht - Ka filluar asfaltimi i rrugës në fidanishte, e cila lidh qendrën e qytetit, me Lagjen Ilirida dhe tutje fshatrat e luginës së Ibrit.

Nënkryetari i komunës, Safet Kamberi, i shoqëruar edhe nga drejtori i Shërbimeve Publike dhe Infrastrukturës, Blerim Baruti, kanë përcjell nga afër fillimin e punimeve për asfaltimin e  kësaj rruge.

Ky projekt realizohet në bashkëfinancim nga Komuna e Mitrovicës dhe Ministria e Infrastrukturës të Kosovës. Kostoja e tërësishme e projektit  do të jetë  245 mijë euro, ndërsa,  punimet do t`i kryej kompania “ Lirigzoni Trans”.

Nënkryetari i komunës, Safet Kamberi theksoi se autoritetet komunale janë të përkushtuara që të implementojnë projekte të ndryshme që do të ndikonin në përmirësimin e jetës së qytetarëve. Ai tha se rruga  është duke u shtruar sipas standardeve më të larta të kërkuara.

“Besoj që ndërtimi kësaj rruge në këtë pjesë të qytetit ka rëndësi të madhe, pasi që ajo do të shkarkoj rrugët e qytetit dhe me këtë do të ketë një qarkullim më me pak pengesa për automjete. Autoritetet  komunale janë të angazhuara dhe të përqendruara në realizmin e atyre projekteve që duan zgjidhje të shpejtë”, tha ai.

Duke folur për rëndësinë e rregullimit të kësaj rruge, Blerim Baruti, drejtor i Shërbimeve Publike dhe Infrastrukturës, tha se  ky projekt është realizuar në kuadër të planit  të punës së  DSHPI-së.

Sipas tij,  punimet  është duke i kryer kompania “Lirigzoni Trans”, me një  dinamikë të shtuar.  Ai edhe me këtë rast tha se Drejtoria e Shërbimeve Publike dhe Infrastrukturës, si prioritet ka përmirësimin e infrastrukturës  në të gjitha nivelet në Komunën e Mitrovicës.

“Rruga e cila sapo filloi të asfaltohet, është një projekt i cili do të kushtoj 244.459.50 euro.  Rruga është me gjatësi prej 895 metrash dhe gjerësi 7 metra. Ne jemi  duke punuar që të realizohen sa më shumë projekte që përmirësojnë infrastrukturën e përgjithshme në komunën tonë”, tha ai.