Prishtinë, 11 nëntor - Shteti i Bosnje Hercegovinës pretendon se Kosova i ka borxh 83 vagonë të trenave që mbetën këtu për shkak të luftës së fundit. Ministria e Zhvillimit Ekonomik nuk është e informuar rreth kësaj çështjeje, por e këshillon Sarajevën që përgjigjen ta kërkojë në Organizatën e Kombeve të Bashkuara.

Vagonët që po i kërkojnë boshnjakët ka gjasë të mos i marrin kurrë nga Kosova. Ata ose mund të jenë copëtuar dhe shitur për skrap ose mund të jenë duke u shfrytëzuar për transport të mallrave dhe njerëzve diku në Serbi, njofton Express.

Gjasat janë shumë më të mëdha që mbetjet e tyre tashmë të jenë shkrirë në shkritore të Maqedonisë e Malit të Zi.

Për këtë, qe shtatë vjet është duke vazhduar një proces gjyqësor kundër disa ish-zyrtarëve të hekurudhave, që i shitën qindra vagonë të mbetur nga lufta për hekur.

E institucionet e Kosovës nuk informacion se vagonët mbi të cilët pretendon pronësi Bosnja e Hercegovina gjinden në territorin e Kosovës.

Madje edhe nëse kanë qenë ndonjëherë dhe janë shitur, apo “kanë humbur rrugë” në binarë, Qeveria e Kosovës nuk pranon të marrë përgjegjësi për ta.

Në Ministrinë e Zhvillimit Ekonomik thonë se nëse kërkesa e këtij shteti ka të bëjë me periudhën e parapavarësisë, deri në vitin 2008, më kot iu drejtohen atyre.

\"Le t’iu drejtohen Administratës së Kombeve të Bashkuara, pasi në atë kohë ka menaxhuar UNMIK-u me hekurudhat\", thotë Gëzim Baxhaku, këshilltar për media në MZHE. /