Madrid, 28 janar - Mesfushori i Barcelonës, Xavi Hernandez, ka deklaruar për mediat spanjolle se skuadra e tij nuk duhet ta nënvlerësojë aspak Realin e Madridit në gjysmëfinalen e Kupës së Mbretit, e cila do të luhet ditën e enjte.

Reali duhet të përballet me Barcelonën pa kapitenin e saj Iker Casillas dhe mbrojtësin Pepe, pasi të dy lojtarët kanë pësuar dëmtime, por gjithsesi Xavi mendon se edhe me mungesa “Los Blancos” mbetet një skuadër e frikshme.

“Këto ndeshje janë gjithmonë të paparashikueshme. Ne gjendemi në një formë mjaft të mirë tashmë por çdo gjë mund të ndodhë sepse i tillë është futbolli,” tha Xavi për gazetarët.

“Ata do të vuajnë mungesën e disa prej lojtarëve kryesorë, por gjithsesi, Reali është Reali dhe është mjaft e vështirë që ta mposhtësh lehtësisht.” Mesfushori i përfaqësueses spanjolle gjeti kohën të komentonte gjithashtu edhe sfidën e Champions League ndaj skuadrës së Milanit.

“Milani është një skuadër mjaft e vështirë për t’u mundur. Ata kanë qenë gjithmonë mjaft të mirë në mbrojtje. San Siro nuk është aspak një vend i thjeshtë për të fituar pasi gëzon mbështetjen e një tifozerie mjaft të zjarrtë,” shtoi Xavi.