Londër, 14 dhjetor - Fernando Torres, dikur sulmuesi nga i cili mbrojtësit kishin frikë, mund ta shënojë 1-vjetorin tek Chelsea, duke u larguar nga ky klub.

Daily Mail raporton se Chelsea ka vendosur ta nxjerrë në shitje në janar blerjen më të shtrenjtë dhe më të dështuar ndonjëherë.

Fillimisht, londinezët planifikonin ta huazonin në ndonjë klub, por raportohet se definitivisht do ta shesin në cilindo klub që ofron 25 milionë euro dhe merret vesh me të për të ardhurat vjetore.

Andre Villas Boas mendoi se do ta rikthejë në formë, por nuk ia doli. Drogba dhe Sturridge janë opsione në sulm para tij. Ai nuk festoi aspak kur banka rezervë shpërtheu me golin e fitores të Lampard ndaj Cityt.

Torres kaloi 13 lojë pa shënuar në Chelsea pas transferimit, dhe të parin gol e shënoi më 23 prill kundër West Hamit. Të gjithë u gëzuan për të, po për golin e dytë u deshtën të kalojnë edhe 9 ndeshje, kur ai shënoi kundër United më 18 shtator.

Në total, ka shënuar vetëm 4 gola këtë sezon, edhe pse ka nisur në 11 ndeshje. Dy nga këto gola i ka shënuar kundër Genk në Ligën e Kampionëve.

Ai i kushtoi Chelseat 58 milionë euro dhe është transferi rekord më i shtrenjtë në Britaninë e Madhe.